أمواج الأندلس أمواج عربية
أهلا ومرحبا بك زائرنا الكريم، إذا كانت هذه زيارتك الأولى للمنتدى، يشرفنا أن تقوم بالتسجيل اذا رغبت بالمشاركة في المنتدى، أما إذا رغبت بقراءة المواضيع فتفضل بزيارة القسم الذي ترغب أدناه
عزيزى الزائر يسعدنا ان تنضم الينا وتلحق بنا
كى تفيد وتستفيد بادر بالتسجيل مع اطيب الامنيات ادارة المنتدا
ورجاء التسجيل باسماء لها دلالية الاحترام



وطن واحد هدف واحد قلب واحد قلم واحد تلك هى حقيقة أمواج الاندلس
 
أمواج الأندلسأمواج الأندلس  الرئيسيةالرئيسية  التسجيلالتسجيل  دخولدخول  مدونة أمواج صغيرةمدونة أمواج صغيرة  أضغط وادخل وابحثأضغط وادخل وابحث  

شاطر | 
 

 مسحراتى لاشهر الشعراء وكل يوم مسحراتى جديد

استعرض الموضوع السابق استعرض الموضوع التالي اذهب الى الأسفل 
انتقل الى الصفحة : الصفحة السابقة  1, 2
كاتب الموضوعرسالة
شريف الحكيم
عضو فعال
عضو فعال


عدد المساهمات : 4033
تاريخ التسجيل : 19/12/2009

مُساهمةموضوع: رد: مسحراتى لاشهر الشعراء وكل يوم مسحراتى جديد   الجمعة سبتمبر 03, 2010 1:46 am

مسحرااااااتى..
بعد الصلا على كامل النور
كامل مكمَّل وأهدانا الكتاب دستور
قرآن كريم وطَهور
ساوى ما بين البشر
بدَر تقاوى التقوى
فى صحرا القلوب البور
إصحى يا فج النور
يا أبيض النيَّة
يا حاج عبد الصبور
يا بو الشقا
عرقك سقا "الطبلية"
يا مُشرقة يا بدور
آن الأوان للسحور
..............
على كتفى شلت الحجر
والدنيا عريانة
رمل وزلط واتخلط
أسمنت خرسانة
أطنان حديد يا جدع
تسد عين الشمس
من أمس أمس الأمس
أنا طايفة المعمار
صاحب يا مصر عمار
أنا المقاول وانا ريس الأنفار
فى كل شارع وحارة
نقاش مبيِّض محارة
فى البرد.. فى القيالة
غنيت مع الرجالة
ورفعت قصعة مونة
وطلعت ع السقالة
لا جيب ولا سيَّالة
ولا قلت ده مكتوب
وضربت ياما طوب
تفتح لك العتبات
وخطفت ياما قلوب
بصِّت على العمارات
القلعة والأهرامات
مطارات كبارى وموانى
ف ازاى يجيلك قلب تنسانى
وتقول دى مصر اتبنت
على يد حلوانى
واللى بناها أنا
فى الأصل واد بنَّا
شمَّر دراعه وبنى
ثم انزوى وغنَّى
موال يلف المدى
مليان قناعة ورضا
لكّن فى رجع الصدى
تسمع أكيد أنَّة !!
.................
مسحرااااااتى..
مسحرااااااتى..
مسحرااااااتى.


~~~~أذكر الله~~~~




الرجوع الى أعلى الصفحة اذهب الى الأسفل
http://amoaagsherif.ahlamontada.com
محمد أبو نظارة
المدير العام
المدير العام


عدد المساهمات : 1748
تاريخ التسجيل : 30/01/2010

مُساهمةموضوع: رد: مسحراتى لاشهر الشعراء وكل يوم مسحراتى جديد   السبت سبتمبر 04, 2010 6:22 am

مسحرااااااتى..
بعد الصلاة على ناصر المظلوم
عاشق جمالك يا نبى
يا أبو الكرم بيدوم
دانت لك الدنيا شرق وغرب
يهود وفرس وروم
وجيت بقرآن أمان
هَدى لبنى الإنسان
إصحى يا ست حنان
يا أم الحمول التقيلة
اصحى يا ست إقبال
يا أم الحمول أتقل
وقولوا رب كريم
يلم شمل العيلة
وقولوا قادر كريم
تبقى الحياة أجمل.

كان جدى يحلق للزباين
فى السوق أو فى الجناين
جوَّه بيت أو غيط
جنب حيط.. أو تحت شجرة
فى النهار.. أو ضَى قمرة
يقعد أمامه الزبون ماسك مراية
وقبل ما يكمِّل حكايته للنهاية
يحلق له بالمَكَنَة زلط
يحلق له جلط
ويخش على دقنه بصابون
ماركة نابولسى
والفُرشة تتحرك فى إيده
كما الفراشة
وتسيب رغاوى وبشاشة
زى كبشة قطن أبيض ع الخدود
ويسن موسُه فوق حزام جلد "القاعود"
اللى متعلَّق فى كتفه
وكل ما يقشط رغاوى يمسحها فى كفّه
والزبون وشُّه ينوَّر
من غير ما يسأل يا زبون نفسك فى إيه
والزبون عمره ما قال له عملت إيه
كان جدى يتربَّع على حتِّة حصير
والزبون يدِّى له وشُّه أو قفاه
وفـ وقفة العيد تلقى العيال طوابير
وكل أهل البلد يطلبوا دايماً رضاه
كان عنده شنطة زى شنطة باشحكيم
فيها حقن فيها إبر فيها قماقم بنسلين
فيها أقراص إسبرين
وفيها قطن وشاش.. بلاستر
ويمكن اكتر من كده
وكان يطاهر أو يطهَّر كل جرح
وكان يداوى العيانين فى كل حين
ويقول لنا يا مسلمين النضافة من الإيمان
ما اعرفش ليه افتكرته دلوقتى
مع إنه ميِّت من زمان
جايز عشان عندى صالون
يلمع من المرايات
متعبِّى ريحة برفانات
جايز عشان الزبون بيدفع الجنيهات
ويتنِّى بالبقشيش
لكن زمان زمان زمان
كانت الحلاقة بحتة من جبنة قريش
أو حفنة من غلة درة أو من دشيش

مسحرااااااتى..
مسحرااااااتى..
مسحرااااااتى.

~~~~أذكر الله~~~~



الرجوع الى أعلى الصفحة اذهب الى الأسفل
وفاءعبده
موجة شرفيه
موجة شرفيه


عدد المساهمات : 492
تاريخ التسجيل : 04/05/2010

مُساهمةموضوع: رد: مسحراتى لاشهر الشعراء وكل يوم مسحراتى جديد   السبت سبتمبر 04, 2010 9:41 pm


مسحراتى

حلّ الليل وأسدل ستائره


معلناه قدوم السكون وروعة التأمل

هممت بالخروج لايقاظ الناس

على موعد السحور،

اخذت ادق طبلتي وانادي

يا نايم وحد الدايم.

صغار يتراكضون نحو

النوافذ و "البرندات

ومن على الأسطح ليشاهدوني

وفي اذهانهم تلك الشخصية

يسمعون عنها طوال النهار: المسحّر!


اقتربت من مجموعة اطفال ،

جذبتهم إلي إيقاعات

الطبلة الرتيبة المصاحبة لصوتى


الجهور، تجولوا معي ، صفقوا وغنوا وضحكوا كثيراً.

لا اخفيكم انني اكون بقمة السعادة بهذه العلاقة

القوية بيني وبين الأطفال،

فرغم مشاكساتهم الا أن تلويحهم

لي بأيديهم الصغيرة


وضحكاتهم البريئة بعد ان ابتعد عنهم

فيلة بجعل يومي احلى ووقت السحور ملئياًً بالفرح.



نعم يا أعزائي، قد أكون أتجشم المتاعب


وأقطع المسافات مشيا على قدمي


وأتخلل كل نعم يا أعزائي

قد أكون أتجشم المتاعب وأقطع المسافات مشيا على قدمي


وأتخلل كل الأزقة والخلوات لأوقظ أصحابها..لكن صدقوني


ان فرحة الصغار وصبية الحارة بقدومي،


وسماع صوتي، تجعلني اتمنى استعجال


استعجال اليوم التالي حتى أخرج عليهم وارى تلويحات

تلويحات أيديهم التي لا تشبه اكثر من خفقان القلب


ونسيم ليلة صيفية في رمضان



الرجوع الى أعلى الصفحة اذهب الى الأسفل
النبيل
عضو مميز
عضو مميز


عدد المساهمات : 62
تاريخ التسجيل : 30/08/2010

مُساهمةموضوع: رد: مسحراتى لاشهر الشعراء وكل يوم مسحراتى جديد   السبت سبتمبر 04, 2010 11:11 pm

الشمس لو طلت بنورها ع القلوب
تقفل بيبان الليل على جرح الشقا
الشمس لو صرخت بصوتها ف الدروب
يطرح سكات الأرض عناقيد الهنا
والأرض يصبح ليها صوت
ومسحراتى بلدنا نام
والنوم حكيم
كان ياما كان
يصرخ يقول .. على دقتين
أصحى وصلى عل الحبيب
يمكن تنول برضاه صفا
لليل الشقا ... مرسوم على كف الخراب
تقرا خطوطه الضيقة
غجرية من دم وتراب
كدابة لكن همسها
أفيون قلوب
مع أن نور المصطفى
شق الدروب
لسانا تايهين ف الحياة
لسانا رافضين الدفا
ومسحراتى بلدنا نام
والنوم حكيم
كان ياما كان
يصرخ يقول .. على دقتين
اصحى وصلى عل الحبيب
يمكن تنول برضاه صفا
الرجوع الى أعلى الصفحة اذهب الى الأسفل
محمد أبو نظارة
المدير العام
المدير العام


عدد المساهمات : 1748
تاريخ التسجيل : 30/01/2010

مُساهمةموضوع: رد: مسحراتى لاشهر الشعراء وكل يوم مسحراتى جديد   الأحد سبتمبر 05, 2010 2:28 am



مسحرااااااتى..
بعد الصلا على خاتم الأنبياء
نورٌ على وجهه أضاء
وف ليلة الإسراء عرج
ثم دنا من عرش رب السماء
ثم ارتوى بالامتلاء
لما رأى بلا حجاب
اصحى يا أستاذ إيهاب
ياللى داب قلبك محبة
واتكوى بجمر العذاب
اصحى يا سمسم يا غاوى
الحمام جذب وغناوى
والهديل سر الشباب.

فى دنيا ماشية
تضرب طناشى
تروسيكل ماشى
للخلف دُر
ساعات أبدِّل
كتير أزُقه
أكتر أجر
بين عمر عدَّى
من ألف مدة
وعمر حاضر
وعمر آتى
بياع جيلاتى
فى دنيا حر
واطلع ليلاتى
أفضل أهاتى
يطرِّى قلبك
ما هوش مُضر

يا دنيا عرجا
شيكولاتة مانجة
مش م الفرنجة
يا ناس يا شر
ولبن فراولة
للمعدة أولى
فادِّيها دومينو
وعشرة طاولة
وخد كاساتا
واعمل محاولة
أنا هامشى تاتا
يمكن تنادى
هاطلع جيلاتى
وارجع زبادى
لكن بسكَّر
وتلج أكتر
شربات مكرَّر
بس أنت قرَّر
أصل أنت حُر.

الشوق رمانى
ع الناصية تانى
رآنى حبِّى
فقام نادانى
قال يا اسمرانى
ماعادش كانى
هات بالفانيليا
حبِّة أغانى
لعيون كاميليا
ده العمر فانى
من أجل سحرى
إغرق عشانى
هوانا بحرى
دايماً يسر.

مسحرااااااتى..
مسحرااااااتى..
مسحرااااااتى.


~~~~أذكر الله~~~~



الرجوع الى أعلى الصفحة اذهب الى الأسفل
د / عبد الرحمن
نائب المدير

نائب المدير


عدد المساهمات : 1194
تاريخ التسجيل : 31/03/2010

مُساهمةموضوع: رد: مسحراتى لاشهر الشعراء وكل يوم مسحراتى جديد   الإثنين سبتمبر 06, 2010 3:44 pm

مسحرااااااتى..
بسم الكريم نبتدى
خَلَقها أنشاها
رفع السما بلا عمد
والأرض سواها
والنفس ألهمها الفجور
ألهمها تقواها
من تانى نرجع نسلِّم
ونصلى على طه
الدنيا كانت مُعتمة
وبنوره أغشاها
الحق بان والخُطا
عرفت تسير فيها
إصحى يا معلِّم عطا
وصحِّى زوجتك نبيهة
نيِّة صيامنا السحور
ما تفكروش فى الفطور
ربَّك يسويها.
..........
فكهانى والفاكهة عندى
من كل لون أو صنف
تعالى دحرج عيونك
وبُص على أى رف
بس انت شاور
ياللى انت شارى
أرد اقولك
حاضر ونُص.
.............
حَمَار حلاوة
من غير نقاوة
بطيخى شيليان
ومَطْر نمس
ومانجة هندى
ومانجة فونس
ودى تبقى زبدة
والتانية فَص
بس انت شاور
ياللى انت شارى
أرد اقولك
حاضر ونُص.
...........
رمان بشق القمر لذيذ
عنب بناتى والاَّ كريز
وتين رمادى زى المربَّة
يجمع أحبَّة ساعة عصارى
برقوق نبيتى واصفر كنارى
تفاح وريثك يا عم آدم
يا ستى حوا
الجنة جوَّه
بتلاغى نارى
بس انت شاور
ياللى انت شارى
أرد اقولك
حاضر ونُص.
............
وبرتقانى بلدى وبسرَّة
وموز بقشره
أو موز مقشَّر
كُمترى قادرة
تضحك تكشَّر
وخوخ يخاوى
خدود حبيبى
وكيوى يكوى
بس انت دارى
أو حتى شاور
ياللى انت شارى
أرد اقولك
حاضر ونُص.
.............
مسحرااااااتى..
مسحرااااااتى..
مسحرااااااتى.

الرجوع الى أعلى الصفحة اذهب الى الأسفل
هدير الحكيم
مراقب عام

مراقب عام


عدد المساهمات : 190
تاريخ التسجيل : 23/07/2010

مُساهمةموضوع: رد: مسحراتى لاشهر الشعراء وكل يوم مسحراتى جديد   الثلاثاء سبتمبر 07, 2010 1:39 am

مسحرااااااتى..
بعد الصلاة على كافة الأنبياء
وأخص بالذكر طه الأمين
صلوا عليه يا مسلمين
يا سامعين النداء
صلوا لمن جاء
تتمة للأخلاق
إصحى يا عبرزاق
ونادى على مسعدة
مشيت من السيدة
وجيت لحد بولاق
عشان اسحَّر ندى
وأبو العلا ونجلاء.
................
موسى نبى عيسى نبى
محمد نبى
وكل من له نبى يصلى عليه
إسمع يا مؤمن
وصدق وآمن
وخد وانت ضامن
دى زى الحليب
بضاعة ألسطة
لصاحب النصيب
لا هيَّ أونطة
ولا فيها عيب
ففتح عيونك وشخلل جيوب
وسيبها علينا لو انت مفلس
ربَّك شايفنا وفرجه قريب.
.............
أنا ابن الدنيا ادتنى دروس
أنا ترس ف آلة وياما تروس
تطحن بعضيها فـ دنيا زحام
أكتر من نص كلامى كلام
بيروح فى الهوا ويهدِّى نفوس
بيروح فى الهوا يرجع لى حمام
أركب أتوبيس من غير أجرة
وأرش حروفى كما البودرة
وانزل ما اعملش زعل وخصام
ياما دارت لفت بى الأيام
وتعبت ما بين كراريس واقلام
جلدة حنفية أو بوتاجاز
وساعات برواز.. بآيات قرآن
وحجارة راديو وقصافة
وكمان أمواس أغلى الماركات
وكتب بتعلِّم وحديها من غير أستاذ
وأساتك.. إبرة.. خيوط.. مرايات
وأشوفنى ساعات بياع نعناع
واقول للفم يعطَّر فم
واقول للدم يروَّق دم
يشيل من راسك أى صداع
...............
واحلم بمحل يخلينى
أرتاح م اللف
أو حتى اتلم ف باترينة
مافيهاش ولا رف
وشوية شوية أعمرها
وبأجدع صنف
فاكرمنا يا رب انت العالم بالمتخبى
إدينى يا بو الرزق الواسع ريَّح قلبى
العرق السايل على قورتى ينشف ويجف
وأنام فى البيت وياَّ ولادى والعين ما ترف.
.............
مسحرااااااتى..
مسحرااااااتى..
مسحرااااااتى.

الرجوع الى أعلى الصفحة اذهب الى الأسفل
المهندس / كمال
موجة اشراف عام
موجة اشراف عام


عدد المساهمات : 520
تاريخ التسجيل : 04/04/2010

مُساهمةموضوع: رد: مسحراتى لاشهر الشعراء وكل يوم مسحراتى جديد   الأربعاء سبتمبر 08, 2010 1:12 am

مسحرااااااتى..
آمنا بيك يا رب
وعلى نبيك صلينا
وبنور سناه اهتدينا
وعلى سكته مشينا
فى القلب قرآنك هدى
وحقيقة مش تزييف
إصحى يا بو الأولاد
يا فؤاد.. يا حاج شريف
يا نسمة وقت الصيف
إصحى يا بو الأمجاد
يا سيف.. يا مصطبة للضيف
آن السحور اسمعوا
أنا جيت أسحَّركم
أنا ماركة واحدة تلاقينى
فى المدن والريف.
.............
فى الليلة قبل الأخيرة
أنا جاى ع السيرة
بالكف اطبطب وابطط
واجعلها ع الطبطابة
أفردها بالنشابة
وانفضها زى الملاية
وافرشها زى الحصيرة
وارميها جوَّه النار
ترجع لى أطعم فطيرة.
.............
بـ الت واعجن
لكنى مش رغاى
وكل من شاف صنعتى
يغنى معاى
وهىَّ طايرة
تزغرد تقول باى باى
وتحط تانى ف ثوانى
ع الرخام دايرة
والخلق حايرة
بتستغرب تقول ازاى.
.............
أنا الفطاطرى
وباعمل بالدقيق أصناف
فيه حلو.. حادق.. مشطشط
طرى أو محمص.. جاف
جوز هند ممكن زبيب
وبطعم خوخ وخشاف
بسطرمة تونة.. فطيرى
كامل الأوصاف.
..............
البيتزا يا محترم
وارد بلاد برَّة
نصيحة خدها مريحة
إنساها بالمرة
وان كنت غاوى الفطير
إسال أنا مجرَّب
شرَّق وغرَّب
هترجع عندى وتقرَّب
تدوق حلاوة صنعتى
وتعاود الكرَّة.
.............
مسحرااااااتى..
مسحرااااااتى..
مسحرااااااتى.


~~~~أذكر الله~~~~


الرجوع الى أعلى الصفحة اذهب الى الأسفل
محمد أبو نظارة
المدير العام
المدير العام


عدد المساهمات : 1748
تاريخ التسجيل : 30/01/2010

مُساهمةموضوع: رد: مسحراتى لاشهر الشعراء وكل يوم مسحراتى جديد   الخميس سبتمبر 09, 2010 2:32 am


مسحرااااااتى..
أول وآخر كلامى
صلاتى وسلامى
ع الهاشمى التهامى
سيدى النبى خير الأسامى
جد الحسن والحسين
كحَّلت بيه العين.. وجيت
يا صُحبتى وطلِّيت
ع الصائمين.. لفيِّت
وناديت على النايمين
أسطوات ومعلمين وافندية
عمال صنايعية
يتلمّوا ع الطبلية
يتلمّوا ع اللقمة الهنيَّة
على قُلِّة الميَّة
على ذكر رب الكون
على ذكر خير البرية
..............
عملت يوم فران
صايم فى عز النار
وعربجى بحمار
لا جيب ولا سيَّالة
بنَّا على السقالة
بيئن من جوَّاه
وعملت مطبعجى
والمطبعة عاشقاه
وعملت يوم تاكسجى
يا مصر يا أم الزحام
طيَّرت ياما حمام
من فوق سطوح البيت
تلميذ وغاوى علام
م المدرسة هجِّيت
ممرضة وحبِّيت
على قلبى برد وسلام
تُرَبى كما الأيتام
ما عدش الأيام
ودخلت فى المحكمة
ورفعت ميت مظلمة
ونزلت بحر غرام
صادتنى جنيَّة
وقعدت أبيع فوانيس
ودموعى فى عنيَّا
فلاح لا ساب الغيط
ولا جاب تقاوى الفراولة
وشويت كيزان الدرة
للمُفلسين أولى
وقعدت ابيع فاكهة
يا عنب يا بناتى
وطلعت أبيع الجيلاتى
رمش العيون صابنى
وكنت أسطى منجِّد
والزمن سابنى
شاعر بنيت القافية والتفعيلة
صحفى وقلت الحق شلت الشيلة
ضحَّكت طوب الأرض.. بلياتشو
وعجنت أحلى فطير لكل العيلة
ولسَّه عندى كلام ماخلصتوش
لا كتبت عن جزمجى
ولا طُرشجى وترزجى
ولا طعمجى وأجزجى
ولا مكوجى وأفيجى
ولا بلطجى وعافيجى
ولا بوسطجى وقهوجى
ولا بورمجى أونطجى
وقمرتجى حبرتجى
أو سفرجى وبوهيجى
ولا حلوجى وكُفتجى
ولا ورشجى وطاولجى
...............
ولا موسيقى قانونجى
أفيونجى أو خمورجى
شماشيرجى جواهرجى
محولجى أو عطشجى
جزار أو واد فرارجى
سمسار أنفار حلنجى
ومكنجى.. مخزنجى
كبابجى دراماتورجى
جناينى.. فواخرجى
..............
ولا باشتمرجى وباشحكيم
ولا باشمهندس باتشويش
ولا حتى باشكاتب حريم
خيَّال وعجلاتى
غازية طبَّال فلاتى
نسناس وقرداتى
عرَّافة أو دجَّال
نساجة أو فوَّال
شغالة أو شيّال
سمكرى ونشال
وكومسارى وعتَّال
دباغ جلود.. كيَّال
عشماوى أو بقَّال
حاوى ومجبّراتى
بوَّاب حطَّاب ساعاتى
نصَّاب ومهلباتى
كوافيرة.. مصوراتى
سقا ومشهلاتى
...............
ولا سباك ولا حبَّاك
ولا نجار لباب شباك
ولا عطار ولا عصَّار
ولا غوَّاص ولا بحَّار
ولا خوَّاص ولا طيَّار
ولا لبَّان ولا سنَّان
ولا موَّان ولا عجَّان
ولا سجان ولا مسجون
ولا مقرئ ولا مأذون
ولا شحات ولا مجنون
ولا كلاَّف ولا صرَّاف
ولا خطَّاف ولا خزَّاف
ولا حتى كفيف شوَّاف
...............
وقلت ياريت
إن طال العمر يا أهلى وجيت
ها كتب حواديت
جن وعفاريت
عن عيِّل بيربى الكتاكيت
وبيطلع فوق السطح يوماتى
يقول مواويل
وصبية بتحلم تبقى عروسة
وصاحبة بيت
صبَّحت عليكم.. لأ.. مسِّيت
ووصلت ختام
خدوا منّى تمام
تلاتين بوسة
بعدد الأيام
ويا مصر يا غالية يا محروسة
باى باى وسلام.
.............
مسحرااااااتى..
مسحرااااااتى..
مسحرااااااتى.

~~~~أذكر الله~~~~



الرجوع الى أعلى الصفحة اذهب الى الأسفل
شريف الحكيم
عضو فعال
عضو فعال


عدد المساهمات : 4033
تاريخ التسجيل : 19/12/2009

مُساهمةموضوع: رد: مسحراتى لاشهر الشعراء وكل يوم مسحراتى جديد   الجمعة يوليو 27, 2012 10:20 pm

اصحى يا نايم ـ ـ وحد الدايم
يلا ع الميدان
الشعـب صـاحب كـلمته
وبهمته
شايل على كـتـفه الوطن
يا شعـب وإنت البطل
والبطل إنت
قالولى شعـبك مات
أنا قلت من امتة
يموت الظلم والطغيان
ونبض الشعـب ما يموتـشى
يموت الذل والجلاد
ونبض الشعب ما يموتـشى
يموت السجن والسجان
ونبض الشعب ما يموتـشى
يا شعب وإنت الترمومتر لثورتك
وبخبرتك
تـقدر تـفرق بين الفجر والضلمة
تـقدر تـفرق بين الحق والباطل
واللى بيماطل
تـقدر تفرق بين واحد كلامه كتير
وبقلبه رافض للتـغيـير
طول ما الأمور ف بلدنا معكوسة
نزرع سنابل قمح تطرح لنا كوسة
اصحى يا نايم ـ ـ وحد الدايم
يلا ع الميدان

~~~~أذكر الله~~~~




الرجوع الى أعلى الصفحة اذهب الى الأسفل
http://amoaagsherif.ahlamontada.com
د / عبد الرحمن
نائب المدير

نائب المدير


عدد المساهمات : 1194
تاريخ التسجيل : 31/03/2010

مُساهمةموضوع: رد: مسحراتى لاشهر الشعراء وكل يوم مسحراتى جديد   السبت يوليو 28, 2012 4:18 pm

اصح يا نايم ـ ـ وحد الدايم
يلا ع الميدان
رمضان كـريم وإحنا
فى كل عام متجمعـين
ومعـديـين محنة
والمحنة محنـة وطن
وبإذن واحد أحد
بإيمانا هنعـدى
أمانة يا مراكـبى
عند السويس هدى
مسيلى ع الثوار
طفيلى شوق عندى
بالقرب من شط القناة
أجيال تسلم بعـضها
شعـلة الحرية
والشعـلة طافـت مصر
من أسوان للمنـشية
وإسكندرية مارية
وترابها زعفران
من طابا للسلوم
كل الشباب ثوار
كل الشباب أحرار
اصح يا نايم ـ ـ وحد الدايم
يلا ع الميدان




الرجوع الى أعلى الصفحة اذهب الى الأسفل
شريف الحكيم
عضو فعال
عضو فعال


عدد المساهمات : 4033
تاريخ التسجيل : 19/12/2009

مُساهمةموضوع: رد: مسحراتى لاشهر الشعراء وكل يوم مسحراتى جديد   السبت يوليو 28, 2012 4:25 pm

إصحى يانايم ـ ـ وحد الدايم
يلا ع الميدان
على فيض الكـريم ماشى
وإنـتى اللى باقية يا مصر
وأنا ماشى
واللى إنكـتب فوق الجـبـين
لازم نـشوفه
من جدنا خوفو وخـفرع
للملك مخلوع الأول
يا مصر يا أم الهرم والنيل
بـيسيل على خدك دموع الفرح
وبـينطرح ألفين سؤال ودليل
مين اللى باع من غير تمن
ومين اللى ضحى بعمره وبدمه
عزك ونصرك كان مراده
صبرك وصبره ميته وذاده
مين اللى خان الأرض واللقمة
عربد ف رزق الخلق والهدمة
نسمع كلام معسول
والفعـل زى الغول
طول ما الضمير نايم
البطن ما بتـشبع
إصحى يا نايم ـ ـ وحد الدايم
يلا ع الميدان

~~~~أذكر الله~~~~




الرجوع الى أعلى الصفحة اذهب الى الأسفل
http://amoaagsherif.ahlamontada.com
د / عبد الرحمن
نائب المدير

نائب المدير


عدد المساهمات : 1194
تاريخ التسجيل : 31/03/2010

مُساهمةموضوع: رد: مسحراتى لاشهر الشعراء وكل يوم مسحراتى جديد   السبت يوليو 28, 2012 4:28 pm

إصحى يا نايم ـ ـ وحد الدايم
يلا ع الميدان
صوت الشهيد بـيقول صيام
مش قصده صومنا عن القطايف والكـنافـة
يقصد صيامنا عن الفساد والغـش
نـتوضى ندعى مصر تـتعافى
يقصد صيامنا عن الخـضوع والذل
والكـل يرفع راسه
وف كـراسه يكـتب حر
يقصد صيامنا عن النـفاق والكذب
واللف والدوران
وتـزيـيف الحقايق
واللى مضايق
يطق يموت
وتـفوت شهور وشهور
والثورة لسة مكـملة
والشعب عينه مفـنجلة
سهران وحارس ثورته
إصحى يا نايم ـ ـ وحد الدايم
يلا ع الميدان


الرجوع الى أعلى الصفحة اذهب الى الأسفل
د / عبد الرحمن
نائب المدير

نائب المدير


عدد المساهمات : 1194
تاريخ التسجيل : 31/03/2010

مُساهمةموضوع: رد: مسحراتى لاشهر الشعراء وكل يوم مسحراتى جديد   السبت يوليو 28, 2012 4:31 pm

راضى على الطهطاوى

مسحراتى
أنا طول حياتى
عاشق وهايم
بوحِّد فى دايم
واحمى فى عـِرضك
وامشى فى أرضك
والفلف وادُور
مسحراتى
وحافظ حيطانك
صخورك وحجرك
وريحة غيطانك
بخورك وشجرك
ومين اللى هجرك
وحافظ دروبك
و لحظة غروبك
بغزل حروفى ليكى بدور
مسحراتى
وماشى أنا بتغندر
بسافر وعافر
وهاجر كتاجر وشاه بندر
فنان وراسمك على صدرى
خطوطك شطوطك
خريفك وصيفك
وريفك وبندر
دا ثانيه بعيدك تساوى شهور
مسحراتى
وامشى ف شوارع
واحضن بيوت
بصبر وعزيمه نعدى نفوت
عارف الملامح
وقلبى مسامح
وحافظ الوجوه
ومين يا صبيه
يعشق ترابك
وفيكى يتوه؟!
مسحراتى
أنا طول حياتى
عاشق عيونك
وربى يصونك
وعمرى يا طاهره
ما أفكر أخونك
أروح المطارح
دا حبك وطارح
فى قلبى بذور
مسحراتى
وماشى فى ليلك كله أمان
يا كل الأمومه ونبع الحنان
رمشك سحرنى وسحرك فريد
وابنك يغنى فداكى وشهيد
دا انتى ياحلوه أميرة البحور
مسحراتى
وماشى بنادى
جوا بلادى
يارب يا هادى
خلى المكسل يصحى يقوم
اصحى يا سيد أنت وجلال
ابنى وشيد ورزقك حلال
وصلى لربك واسجد وصوم
وانتى يا قاهره
يا ظاهره يا طاهره
قامت ولادك وهبت تثور
مسحوا دموعك قادوا شموعك
وجرجس وأحمد بيبنوا الجسور
مسحراتى
ماشى بطبله بضرب برن
عنتر يا عبله عاشق يحن
ترابك سماكى
نيلك هواكى
وحَبه حبه
با حلوه يا شابه
الله محبه
شوفى نصيبك
هلالك صليبك
ولا عين تصيبك
حلاوة شبابك
بيفتح فى بابك يقرا كتابك
يلاقى السماحه بتطرح زهور
وقلبى اللى عشقك مزهزه بنور
مسحراتى
أنا طول حياتى
ماشى فى أرضك
بلفلف وادُور

الرجوع الى أعلى الصفحة اذهب الى الأسفل
شريف الحكيم
عضو فعال
عضو فعال


عدد المساهمات : 4033
تاريخ التسجيل : 19/12/2009

مُساهمةموضوع: رد: مسحراتى لاشهر الشعراء وكل يوم مسحراتى جديد   الأربعاء يوليو 10, 2013 9:01 pm

يا مصر يا أم المنارة والجسارة غير نيلها ما طاب طبلى
كل البلاد بلدى فيها أنا لفيت
لكن يا مصر يا غالية رجعت تانى وجيت
ما لقيتش غير نيلك دا بيطاب طبلى
وألف طاب لى والمشى على طبلى

~~~~أذكر الله~~~~




الرجوع الى أعلى الصفحة اذهب الى الأسفل
http://amoaagsherif.ahlamontada.com
 
مسحراتى لاشهر الشعراء وكل يوم مسحراتى جديد
استعرض الموضوع السابق استعرض الموضوع التالي الرجوع الى أعلى الصفحة 
صفحة 2 من اصل 2انتقل الى الصفحة : الصفحة السابقة  1, 2

صلاحيات هذا المنتدى:لاتستطيع الرد على المواضيع في هذا المنتدى
أمواج الأندلس أمواج عربية  :: القاعة ألادبية :: * ألمسحراتى *-
انتقل الى: