أمواج الأندلس أمواج عربية
أهلا ومرحبا بك زائرنا الكريم، إذا كانت هذه زيارتك الأولى للمنتدى، يشرفنا أن تقوم بالتسجيل اذا رغبت بالمشاركة في المنتدى، أما إذا رغبت بقراءة المواضيع فتفضل بزيارة القسم الذي ترغب أدناه
عزيزى الزائر يسعدنا ان تنضم الينا وتلحق بنا
كى تفيد وتستفيد بادر بالتسجيل مع اطيب الامنيات ادارة المنتدا
ورجاء التسجيل باسماء لها دلالية الاحترام



وطن واحد هدف واحد قلب واحد قلم واحد تلك هى حقيقة أمواج الاندلس
 
أمواج الأندلسأمواج الأندلس  الرئيسيةالرئيسية  التسجيلالتسجيل  دخولدخول  مدونة أمواج صغيرةمدونة أمواج صغيرة  أضغط وادخل وابحثأضغط وادخل وابحث  

شاطر | 
 

 فؤاد حداد الاعمال الكاملة 45 قصيدة ( المسحراتى ) الجزء الاول

اذهب الى الأسفل 
انتقل الى الصفحة : 1, 2, 3  الصفحة التالية
كاتب الموضوعرسالة
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 7:22 pm




بسم الله الرحمن الرحيم
الاعزاء
اهلا ومرحبا بكم
تقديرا ووفاءَ للكاتب الجميل
نقدم اعمالة كاملة
واليكم الجزء الاول وعددة 45 قصيدة وجميعها بعنوان المسحراتى
وسوف تتوالى باقى الاجزاء بأذن الله وعونة



فؤاد سليم حداد 28 أكتوبر 1928 - 1 نوفمبر 1985

حداد شاعر يصعب تعريفه باقتضاب
ففي خصائصه الأولية الأساسية صفات تبدو متناقضة متنافرة
فهو مسيحي وهو مسلم
وهو عروبي قومي وشيوعي
وهو شامي ومصري،
هذا التنافر بل هذا التعقيد ينفرد أمامنا ويسهل فهمه بالنظر إلى سيرته وإلى شعره.

أنا مصري من أصل شامي لا يغتفر احتشامي
حينطلق من حيشاني صوت الجموع المفرد
أنا مصري من أصل شامي لكني لم استورد
ولا أباع إلا بالعملة المحلية

أسرة حداد متحدرة من لبنان أسرة مسيحية بروتستانتية من قرية عربيه في جبل الشوف،
أبوه سليم حداد أستاذ اقتصاد بارز وفد إلى مصر قبيل الحرب العالمية الأولى
ليعمل مدرسا في كلية التجارة ونال رتبة البكاوية ومازالت كتبه وجداوله تدرس باسمه.
أبويا سليم ندى عينيا معلمني
ما فيش أجمل من الميه
ولا عمارة بعشر أدوار
وأنا معلم كمان أبني
يا ميت بوسة على التعليم
وميت بوسة على الفله
وأنا بأشرب من القله
وكان وشه قمر نوار
يا ميت بوسة لأبويا سليم


الحقيقة طبعاً هما دخلوهم مدارس أجنبية وكان البيت الأم بتتكلم فرنساوي طول الوقت
كده زي العائلات الشامية والأب كان متعصب للغة العربية ومتعصب للعرب
وكان يعني القرآن شغال في البيت طول الوقت،
لما دخلوا المدرسة الفرنسية مدرسة الفرير كان ممنوع أن الأولاد يتكلموا بالعربي داخل المدرسة
ولكن فؤاد حداد كان متمردا في البداية وكان رافض يتكلم بالفرنساوي مع أنه كان متفوق في اللغة الفرنسية ومتفوق جدا في الرياضيات،
الوالد لأن هو بيحب اللغة العربية ومتعصب للعرب كان عاوزهم يبقى خطهم حلو وبيقول لي المدرس الوحيد اللي دخل بيتنا هو مدرس الخط العربي وكان خطه فعلا جميل كده زي سلاسل الذهب زي ما بيقولوا.

أمه من أسرة سورية كاثوليكية وفدت على مصر في النصف الثاني من القرن التاسع عشر، يبدو أن قاهرة الخديوي إسماعيل ومن بعده كانت نقطة جذب للمسيحيين العرب ربما للمسافة التي اتخذتها بعيدا عن الخلافة العثمانية ونظرا للنفوذ الأوروبي المتزايد فيها، أمران نتج عنهما بيئة أكثر تسامحا تسامح يبلغ المحاباة أحيانا تجاه الجاليات المسيحية الوافدة وقد أثرى هؤلاء الحياة الفكرية والفنية في مصر.
مش حملتيني تسع أشهر ضنا
وحملتيني تسع أشهر أمال
احمليني وأنا في العشرين سنة
وخطوط الدم من صدري طوال


من أعماله :

• أحرار وراء القضبان1956
• حنبنى السد 1956
• بقوة العمال وقوة الفلاحين 1968
• قال التاريخ أنا شعري أسود" ديوان فيتنام" 1968
• المسحراتي 1969
• كلمة مصر1975
• من نور الخيال وصنع الأجيال فى تاريخ القاهرة 1982
• استشهاد جمال عبد الناصر 1982
• الحضرة الذكية 1984
• الشاطر حسن 1985
• الحمل الفلسطيني 1985
• أشعار فؤاد حداد ويضم 5 دواوين 1984
• الأعمال الكاملة - فؤاد حداد 2004




عدل سابقا من قبل شريف الحكيم في الثلاثاء فبراير 09, 2010 10:14 pm عدل 2 مرات
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 7:23 pm


أنا الأديب وأبو الأدبا .
اسمي بإذن الله خالد ...
وشعري مفرود الرقبة
زي الألف ...
ورقم واحد ...
والساعة 6 في العتبة.

أشعر شعراء العامية على الإطلاق
هو فؤاد حداد ...

قامة فارهة في الشعر العامي … تعلم الكل منه …
هو فؤاد حداد ...

أول شاعر طبع ديوانا بالعامية المصرية عام 1947

أدهش الكبار - اكبر الكبار - بيرم ... رامي … جاهين ... الأبنودي … حجاب ... نجم ... عبد الباقي….

يقول عنه بيرم التونسي : لا احد أشعر من فؤاد حداد

يقول صلاح جاهين : أنا تلميذ فؤاد حداد

هذا الشاعر الذي هاجم أنظمة الحكم الديكتاتورية ودفع ثمن ذلك في ظلام السجن سنينا عدة

... هو فؤاد حداد


" فؤاد حداد اختار كل حاجة،
كُتب عليه أن يختار كل أموره يعني إحنا في حاجات ولدنا بها وما فكرناش فيها كثير ومستمرة
هو كتب عليه أن يفكر في كل الأمور ويغير كل الأمور،
يعني اختار الوطن
واختار الدين
واختار الانتماء للطبقات الشعبية وهو ابن عائلة طبقة وسطى مترفة،
كانت عائلة كبيرة لأن والده كان أستاذ جامعي
وكان ماسك محاسبة البنك الأهلي كله فما كنش يتصور
إن هو هيطلع من هذا البيت هذا الشيوعي
وعلى فكرة فؤاد حداد كان بيحب يقول أنا شيوعي ... مسلم ويصلي وكل حاجة
لكن أنا شيوعي ما فيهاش هزار ويزعل جدا لو حد قال حضرتك يساري لا، لا أنا شيوعي
فاختار الانتماء للطبقات الشعبية اختيار لم يعد عنه إطلاقا
حتى إذا العائلة زعلت إذا غير و أصبح مسلم وهو كان مسيحيا وأصبح مسلما،
انتماءه للطبقات الشعبية حتى وهو بيمدح الرسول عليه الصلاة والسلام
كان بيقول
يا جموع الفقراء
يمموا غار حراء
سيرى هذا التراب
بعيون لا تراب
عسجديا مسجديا
طأطأت فيه الحراب
يعني كان يحب في الدين أن الدين إنصاف الفقراء
وكان يحب الماروردةية أنها إنصاف للفقراء
وكان يحب في الإنسانية أنها إنصاف للفقراء
لم يكن يعرف إلا الشعر وإنصاف الفقراء."



عدل سابقا من قبل شريف الحكيم في الإثنين أغسطس 08, 2011 11:33 pm عدل 1 مرات
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 7:31 pm

عرب مصاروه




اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي

منقراتني

نازل الليله دي

بمزاج فرايحي

قالت مراوحى

يا قلب إهدا

أنا قلت إيه دا

خليه هليهلي

مزاحى يجلى

إحجل يا حجلى

أنا مش طاووس

حاطير برجلى

يادوب أدوس

أرضى تبارك لي

عاوز أبوس

على ترابها

مناخ عربها

حتى سرابها

يشفي النفوس

هى اللى هي

الانسانية

أم الليالي

أم الشموس

سرقت خيالى

وطبلي صهلل

وقلبى شخلل

زى الفلوس

وزاد جناني

وفاض حنانى

ووردةر سنانى

العرقسوس

لفى يا ساقيه

دور يا قدوس

إحنا بصراحه

عرب فلاحه

فينا السماحه

عرب مصاروه

في مصر أرحم

بلد وثروه

فينا اللى شحم

زى اللى جير

كبير صغير

شايلين فانوس

ومن صعيدى

لبورسعيدى

إيدك وإيدى

علي الغموس



*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 7:36 pm

بايدي نقرة واتنين بقلبي



اصحى يا نايم
وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي

منقراتي

بإيدى نقره

واتنين بقلبى

مطلوب أجود

واقول وازود

وأنا باحود

يادوب وباحبى

بإيدى نقره

واتننين بقلبى

يا مشربيه

في المغربية

سرحت بيه

والليل سرح بى

بإيدى نقره

واتنين بقلبى

يا هلال غويت

الدنيا وغزيت

على بحر زيتى

طلعت مراكبى

بإيدى نقره

واتنين بقلبى

صبح هلالى

قمر ملالى

طل وملالى

وقسم لى نايبى

بإيدى نقره

واتنين

بقلبى

دقت القطايف

شفت اللطايف

خيالى طايف

فى عيون حبايبى

بإيدى نقره

واتنين بقلبى

بإيدى نقره

وبقلبى عشره

سبحان ربى

ما أخافش عثرة

على أرض خضرا

من غير مخاطره

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

سهرت ورديتين والصبح وردية

رجعت للبحر ألحان المراكبيه

والزند شمر وزف الأرض والميه

من شط للتانى والعالم معديه

والقلب دقاته دقات الصنايعيه

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق


عدل سابقا من قبل شريف الحكيم في الثلاثاء فبراير 09, 2010 8:19 pm عدل 1 مرات
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 7:39 pm

دواليب زمان

مسحراتى
منقراتى
منجراتى
دواليب زمان
ماتشتكوشى
دقة شاكوشى
جت فى الاوان
يا ناس حبايب
يا ناس جيران
انا قلبى دايب
على البيبان
عجوز شويه
لكن عينيه
روحين حنان
لا ظنى سيء
و لا جبان
درويش و أسطى
و شيخ كمان
و فى عبى قطه
ازاى حتلعب
فيه الفيران
تسألنى باتعب
أقول صراحه
شقايه راحه
قوة حصان
لاجل و عشان
قبول عيالى
فى الامتحان
و انا فى بالى
حاجات جنان
من الطبالى
اعمل صيوان
و ابنى لخيالى
اربع حيطان
دا انا فى انتقالى
من اولى ساقيه
لسد عالى لقيت مكان
سيرى يا موجه
بالتكنولوجه
لبر الامان
المشى طاب لى
و الدق على طابلى
ناس كانوا قبلى
قالوا فى الامثال
(( الرجل تدب مطرح ما تحب ))
*
و انا صنعتى مسحراتى فى البلد جوال
حبيتو دبيت كما العاشق ليالى طوال
و كل شبر و حته من بلدى
حته من كبدى
حته من موال
لو ماشى فى الصحرا شُفت النور اقول انسان
دا انا كل شباك يقيد اشكر لإيد انسان
و اقول هدتنى المناير سَبَّحت للعرش
يا رب من رحمتك مكنت للانسان
يغير الضلمه اما النور ما يتغيرش
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 7:44 pm

الأشيا معدن



اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي

منقراتي

لقيت أهلا

نزلت سهلا

الأرض برحه

والأشيا معدن

وليالى سمحه

نجومها سبحه

إن كنت نايم

يا نايم اصحى

شوف قلبى هايم

واخدنى فسحه

ما فيش مآسى

على غير مقاسى

يا أبو قلب قاسى

ما بطلوا دا

فى مصر ثوره

عفيه قادرة

أيادى سمرا

وأنفاس ودوده

وأيام تزامل

فلاح وعامل

بالخير حوامل

الخير ولوده

والى فى خيالى

صبح محقق

أحضن عيالى

وأبوس وازقق

وانشد ليالي

بقصب يزقزق

باشيل تلالي

بالكروم وباعزق

فى نجوم تلا لى

عمال أبعزق

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

بلدى على النيل وساكن عش وبنانى

والحمد لله بنيت السد وبناني

غنيت وعشت الأمل وسجدت فى رمضان

للى خلقنى وعلمنى البيان رحمن

قادر يسوى بنانى

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 7:49 pm

أبو فصادة



اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي

منقراتي

مغنواتي

وكلامى دوا

لازم يدون

فى من تلوى

ومن تلون

كمثل سمكة

بتعوم فى كنكه

وعامل لى راجل

شديد فى بأسه

ع الخضرة أحضر

ع الصفرة أصفر

ع البيضه أبيض

والكل فاقه

لكن ما همش

صاحبنا همش

على الدفاتر

وقال تآنسوا

بيروقراطي

يقول قيراطي

فدان بيطرح

دهب بلمسه

فدان بيطرح

من غير ما أفلح

غيرى اللى يسرح

وراجمايسه

لكن الحكايه

لها نهايه

الريش حيسقط

اللي أنت لابسه

أراد صيدا

وكاد صيدا

وكاد كيدا

أبو فصاده

فصاد نفسه

مثل ضربته

والا انضرب لى

علي غرابته

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

كان عندي زغلول ورايح للطبيب عارضه

جسمه رقيق ما تعرف طوله من عرضه

خده انجرح في النسيم لما النسيم عارضه

يا للي حزين ع الي فات وقتلت زغلولى

كان عندى حب الدره أبرك من اللولى

حزنك على مال مكلفني الشقا والغم

والدمع والدم من عينى ومن عين أبى

أدى البلد نورت بالورد والعنب

ورجع لى زغلولي مالك ثورته وعرضه

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 7:52 pm

ليلة القدر



اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

يا رب يا رب

أنا ذو شجن صب

أهدينى للصبر

اخدم فى ناسى

وأوفى بالندر

وقلبى مالي

أبدر آمالى

للعالمين بدر

الرايه قلعى

والصارى ضلعى

قادر على البحر

للسعد إبنى

ولعينى جفنى

وللأمان بر

مالكين مصيرنا

ينصر ناصرنا

صبح لنا قدر

فى كل ناحيه

عينينا صاحيه

يا ليلة القدر

ليلة بكل السنه

الطاقه عرض السما

والطاقه فى الصدر

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

يا بلدى نورك سرح فى كافة الأمصار

بدر الآمال بدر

مهاجرين فى سبيل الله مع الأنصار

غزينا فى بدر

ووفينا بالندر

لمنزل الوحى هادى الوحى والأبصار

فى ليلة القدر

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 8:16 pm

اوصيك يا إبني



اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي

منقراتي

تصدق ابنى

مصوراتي

عجب عجبني

مطرح ما شخبط

وراه مشعبط

رسم لى شجره

فى الحيط بتخبط

ورسم لى قمره

من غير براجل

وؤرسم لى راجل

بيبيع بليله

ورسم عرايس

لا مستحيله

الرمش ناقص

لكن كحيله

ورسم لى ورده

أوراقها فارده

أنا عينى بارده

صحيح جميله

ورسم لي بطه

ما تجيش ببلطه

من غير مغالطه

سحور قبيله

تسلم لى إيده

ما هيش بخيله

الله يزيده

قوه وحيله

الفن سرقك

يا ابنى ورقك

تسقيه بعرقك

يصبح خميله

وارسم لى قله

غطاها فله

أنا أب شاعر

مشيت أشاور

على البشاير

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

أوصيك يا إبني وأتعلم وأقرا معاك

يا إبني أول ما تحفظ الفاتحه

أول كلامك ألف فتحه وب فتحه

أذكر أباك ألف فتحه وب فتحه

الطاقه فاتحه وأبواب السما سامعاك

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 8:27 pm

صاحب مزيه وأستاذيه

اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي

منقراتي

يا سيداتى

وسادتى

بعد التماسى

أنا التماسى

يدوم حماسى

وعادتي

أنا قلب أخضر

بفروع تجرجر

من الشجرجر

مودتى

من غير أذيه

صاحب مزيه

وأستاذيه

في مادتى

وأنا فى انسجامى

ما أنساش لجامى

تحكم كلامى

إرادتى

وباقول ياقافيه

المعنى أفيد

و لا حرف أزيد

عن حاجتى

وانا اللى مؤمن

بالله ومؤمن

بالانسانية

وبالتى

كأنى من يوم

ولادتي

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

أنا كنت فلاح وكان محراتى آه ورا آه

وكنت عامل ما حدش قدره ورآه

وكنت شاعر تئن اقلامى يا ورقاه

دلوقتى صوتى فرايحى فى العزيق والحرت

طبلت أنا وسحرت

قبلت أنا وبحرت

وصبحت أنا مسحراتي سمع الدنيا

ودب مطرح ماحب وكلمته العليا

يمن فجر يوليه اللى شافه وطيبه ورقاه

نده عليكى كأن الدنيا نادهالك

قولة ياليلى ليالي العمر قادهالك

يا عينى بالمواويل الحمر قادهالك

غنى الأمل والشهامه والفرح والنصر

ولولاكي يا مصر كان قلبه رقد هالك

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 8:41 pm

ليل رمضان
اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي

منقراتي

بادور وادور

يا فرح قلبي

بيتنقل بي

من نور لنور

أشوف قبا لى

على الطبالى

صحبه زهور

أقول يا زرعه

هاتى السحور

وانتى يا زلعه

سبع بحور

لقمه هنيه

تكفى ميه

فى سلطانيه

مسلطنه

قال الوردادى

وصلت أنا

ست الحبايب

يا محضنه

أنا اللى أصلى

روح الضنى

وأخضر بقشره

اسمر في قدره

أقول له إطرا

ويقول

فى سلطانيه

مسلطنه

قال الوردادى

وصلت أنا

ست الحبايب

يا محضنه

أنا اللى أصلى

روح الضنى

وأخضر بقشره

اسمر في قدره

أقول له إطرا

ويقول لي غمس

خلص المدمس

يا مين يحمس

لنا الوابور

قامت الرقيقة

أختى الشقيقه

قالت دقيقه

والشاى يدور

الله يخلى

البرتقانه

طلبشت أحلى

قالت لى آنا

شوف الشعور

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

أنا اللي شفت الرياح تسكن قصب مسحور

شفت الجبال تتنقل والبحر يرمى بحور

ولا شفت ليل فى الليالي زى ليل رمضان

ولا فجر أطيب من الفجر اللى بعد السحور

الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 8:43 pm

تبارك الله
مسحراتى
منقراتى
نيلى فراتى
أشرب زُلال
و اقرأ و ردى
وأرعش يا ولدى
من تحت جلدى
فى الابتهال
تبارك الله ذو الجلال

الله رحيم
إن كنت باطمع
فى عينى يلمع
نور النعيم
و بودنى اسمع
أدان بلال
تبارك الله ذو الجلال

الله ودود
أحب وطنى
من غير حدود
و انقّى قطنى
من كل دود
و آخد فى حضنى
كل العيال
تبارك الله ذو الجلال

الله لطيف
تغنينى لقمه
من الرغيف
عن جنس لؤما
وانا الضعيف
من اجل حكمه
أشيل جبال
تبارك الله ذو الجلال

أشيل جبال
و آخد فى حضنى
كل العيال
واسمع بودنى
أدان بلال
طريقى خالى من الضلال
حالف ما اخاوى
إلا الحلال
كل الخطاوى
على كل حال
حتنحسب لى
المشى طاب لى
و الدق على طابلى
ناس كانوا قبلى
قالوا فى الامثال
(( الرجل تدب مطرح ما تحب ))
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 8:46 pm

فرجت وتفرجت
اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي

منقراتي

لا بد أنهج

دى كل ليله

أبهى وابهج

والفن منهج

والطبل شيله

ميلنى ميله

كأنى أعرج

باحاذى الأرصف

وأغني واصرف

فرجت وتفرج

فرجت وتفرج

أستاذ مدارسى

من غير لا كرسى

ولا مدرج

والواد فى إيدى

صبح معيدى

صبح معيدى

يادوب تخرج

فرجت وتفرج

بتقول فى مغنى

أفراحه معنى

وأحزانه بهرج

ونقول فتيله

مهما قتيله

لها يوم تصهرج

فرجت وتفرج

العسر يسرا

الليل بيسرى

والخيل بيسرج

وأنا كلى حكمه

لازم أمهرج

والعب بنجمه

وقمر أدحرج

يا حبايبى أهى جت

على نقره فرجت

ونقره تفرج

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

نده عليكى كأن الدنيا نادهالك

قولة ياليلى ليالي العمر قادهالك

يا عينى بالمواويل الحمر قادهالك

غنى الأمل والشهامه والفرح والنصر

ولولاكي يا مصر كان قلبه رقد هالك

الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 8:48 pm

الكعك
مسحراتى
منقراتى
خالاتى عماتى سيداتى
على تلّ عجوه و عسل و سمن
و لا مجلس المن سهرانين
لَتْ وعجين
يبنوا الهرم
قالت حماة المحترم
يا كعك يا سيد الكرم
نبطلك فى المشمشِ
يا بنت قومى و فرفشي
لا تحوّشي و لا تختشي
احمى الوابور
و استحمشي
اشي اشي
تلاقيه مشي
اشي نغبشي
و اشي حبشي
و اشي دندشي
و اشي انقشي
و اشي ينحشي
و اشي رشرشي
سكر عليه
بركة ايديه
فرحة عينيه
قال ايه و ايه
المشي طاب لى و الدق على طابلى
ناس كانوا قبلى
قالوا فى الامثال
الرجل تدب مطرح ما تحب
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 8:51 pm

خان الخليلى
دُول ريحة الدنيا و أهل الزمان ، يا اطيب الاهل
كلمنى منهم فى الوكاله القديمه
عُمر الصنايعى زهر خان الخليلى
لبَعد سن الاربعين ، لسه
فى عيونه أعطاف الشباب و الصبر
شُفته بينقش فى صينيه جميله
و سمعته يترحم على استاذه
عرفت فيه الاصل و العرفان
لاجل العجب
طلع لى من قلب الدولاب رصه
على بعض بعض و قال لى شوف ديه
طُبقان رموها الفلاحين يا سيد
لاجل العجب
نجْليها ، ننقشها ، نزخرفها
تصبح تحف و الغالى يعرفها
ده الفن ساس بالرقه و الاحساس
و على اساس ربك اراد الخير
*
الفن ما يتُهش سحره ودلاله
اهتز فوق خان الخليلى هلاله
عاوزك لوحده تكتفى و تِخْلاله
لكن ما تكرهش البشر و الناس
*
الفن بين موقوف و بين متأجر
صاحب عيون لما الامل يتفجر
الجن كان ينزل حدانا يفكر
يختار تسالى الصبر والاّ الحماس
*
يا ألف ليله شُفت من أنشاكِ
نور عيدان الشمعدان و المشاكى
دقدق على سن الحديد الشاكى
قسم تقاسيم النسيم فى النحاس
*
و شُفت نور الابريق و طَعم الصوانى
فيها الغزاله و الاسد صنوانِ
القلب يتمر فى حجر صوانى
بالفن يتمر فى الدهب و الماس
*
عندى فى قلب القاهره يا صبيه
الفجر بيعاود من المغربيه
عندى نبات عندى حروف عربيه
نَوَر أَلفهَاَ لكافة الاجناس
*
الفن ساس بالرقه و الاحساس
و على اساس ربك أراد الخير
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 8:52 pm

الشيخ محمد رفعت
أيام ما كان الظل لسه بيحبى
تحت نور الفانوس
و الرَبع كان مأنوس
أيام تسعتاشر إلى اربعين
مش عارفه هى بخيرها والاّ فى
اخرها
الطيبين فى الدنيا و الطيبات
دايماً قلوبهم نبات
كان فيه نقَا
شَكَر اللى طل و سقى
عارف ما حدش جميل
غير اللى قد الشقا
فوت يا زمان على مَهلك
سلم على اهلك
سبح بحمد العليم
على ضى صوت الشيخ محمد رفعت بيقرا فى الذكر الحكيم
الدنيا فجر مجاور السيده
و المغربيه يلالى ألف هلال
و الارض تخشع للجلال
للأمر بالمعروف
للرحمه تجمع امهات الحروف
يا اهل الحوارى فى سنين الاحتلال
الشوق غنّى و الجنه للمظاليم
و مصر حلفت بأنتصار اليتيم
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 8:54 pm

سيد درويش
مين اللى فنان بحق
سر الصبا و الحنين
قلب الزمان اللى دق
ريشه فى ايده اليمين
مين الاشد الارق
على المحبه أمين
شعاع من الفجر شق
يكافىء السهرانين
و كان فى نية بلدنا من سنين و سنين
و أمل فى حضن السما و عرق بيسقى الطين
و هلال مع الطير يوالى الخير على الفدادين
و البحر حط المراكب بالحنان الواجب
ع المينا يا اسكندريه كان بيقصد مين
الموج بيضرب بيضرب
الايام تقرب تقرب
اَسمع (( بلادى بلادى...
تعرف قلوب مصر ماشيه العصر و السكه
و الشمس نازله تُغْرُب
الشمس طالعه تنادى
على بيت فى كوم الدكه
نفرش تلات عتبات
و نفرّق الشربات
تطلع معاك الضحكه
زغروطه من الف جيل
آه يا المعلم بحر
صَبَح صباحنا جميل
صبح أمالنا نبات
قادر يشق الصخر
من كتر شوق النيل
قادر يلاغى الزهر
من طاقه المواويل
و من اكتمال الصبر
طافت عليه و يطوف
على البلاد من حوارى و من زقق وعطوف
يخطر فى باله النغم يلاقى النغم مقطوف

الله يشاء تجتمع فى مهجته العشاق
وارث فوارس وعتاله و مراكبيه
سِيد الرجال على مينا شرقيه
عرب المشايخ و الصنايعيه
كانت حياته جلاله و هديه
و كان ياسين بير يا بهيه
ما تصدقيش غيره يقولك لأ
ما تصدقيش غير اللى فنان بحق
أسمر و جيه اللون
و فيه شبه من اربعين مليون
و فى ايده حنه و مسطرين و سلاح
كان مصرى كامل و كان عامل و كان فلاّح
و كان سيد وكان درويش
و كان واحد وكان الكل
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 8:56 pm

بضاعة الأمريكان
مسحراتى
منــقراتى
مرة فى حياتى
دخلت سيما
شُفت اللى آتى
كان يا ما كان
حمار حصان
بجوزين حوافر
و جوز ودان
عيه مسافر شجيع جبان
يشف فوقه
و يحدف بطوقه
و يقل ذوقه
عيَان بيان
و حبيته شقرا
فى ايديها زهره
فى عنيها زغره
ودموع كمان
طب سيبنا من دى
سيبها فى أمان
آدى فى الأمام
أحمر و هندى
داهن دهان
أبو عين قويه
بالبندقيه
هات يا نشان
يقتله ميه
ويمضغ لبان
و بعد غيبته
يرجع بخيبته
يحضن حبيبته
شوف الحنان
ودا عـــــلم والاّ
دا حــــلم والاّ
دا فــــيلم والاّ
دا شىء جنان
سهرتنا ضاعت
على بضاعة
الأمريكان
كان ليه ندوَّر
فى غير مكان
إحنا اللى نوَّر
فينا الأدان
لازم نطوّر
حواديت زمان
فن الميدان
شعر العروبه
بحر العذوبه
و العنفوان
زى العيدان
نبتت ولادى
فى كل ناحيه
باهتف لتحيا
فنون بلادى
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 8:57 pm

نشيد الموظفين
لا الدم و لا العرق
و لا فلاح عَزَق
و لا حدّاد طَرق
و لا جندى فى الميدان
بسلاحه إذا انطلق
يا سَيدى المواطن
الرَك على الورق
يا كراسى يا مراسى لمراكب التاريخ
و القعده المطمئنه فى دنيا ترُخ الصواريخ
و الزلزال المزلزل
يحْبِى لعندك يوردةل
عسّل يا عقلى عسل
أنا و انت فى الندى
سَهّينى و عينى نايمه
غَلّطنى فى جمع قايمه
و اكتب لى ما عَدا
السهو أو الخطأ
لا الدم و لا العرق ..
عن نُوحى عن سُنوحى و فلاسفة الزمان
لا قامت انسانيه و لا تم الهيلمان
و لا اتبنت حضاره
إلا على الإداره
و اللايحه المستشاره
و الفقه المكتبى
بمنتهى الجداره
آخد مرتبى
و بنظره و احده اعرف
ابنك طالع موظف
و الاّ طالع غبى
من أول ما اتخلق
لا الدم ولا العرق
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 9:00 pm

من يوم عرابي
أنا طول حياتى ضنا يا طول حياتك أُم
يا مصر يا معلمانى الصبر و الخُضره
أنا الفقير الضعيف آمنت بالقدره
يا شبر ايدك فى قلب الليل هلال رجبي
نِزل علىَّ و قال يا ضنا اكتب
و لا حد اغنى من المالك لسان عربي
و لا حد أقوى من اللى عمره ما يكدب
يا شبر ايدك فى قلب الليل هلال رمضان
نزل عليّ وقال لى اسهر على الاوطان
و أنا طول حياتى ضنا يا طول حياتك أُم
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 9:02 pm

حضرة الباشا
يا حضرة الباشا فاكر ياما سَحّرتك
و دمعى تحت القمر بالليل مَسح حارتك
و قلتلك خلّى قطفه لك و قطفه لى
و ربنا يخلّى اطفالك و اطفالى
و لا كنت بتصّلى يا باشا و لا بتصوم
غير كل حبه على السبحه تقول مخصوم
و كنت يا باشا ما بتسمعش بالعربي
حضروا اطبا يردوا السمع و الطاعه
حضروا اطبا يداووا نفْس طماعه
افتح يا سمسم جماعه
حضروا بسماعه تكشف قلب سحارتك
عَمّال يفقر
و انا بنقّر
لا علمى غَلَبُه
و لا فنى مظهر
ولادى طلبه
فى اولى ازهر
و تانيه جيزه
فتره و جيزه
يطلع مهندس
و البنت نرجس
بدال ما تُكنس
حتبقى قاضيه
جيوبى فاضيه
و نفسي راضيه
يا دنيا طاوعى
و يا سكه طاولى

المشى طاب لى
و الدق على طابلى
ناس كانوا قبلى
قالوا فى الامثال
(( الرجل تدب مطرح ما تحب ))
*
و انا صنعتى مسحراتى فى البلد جوال
حبيت و دبيت كما العاشق ليالى طوال
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 9:08 pm

دواليب زمان
مسحراتى
منقراتى
منجراتى
دواليب زمان
ماتشتكوشى
دقة شاكوشى
جت فى الاوان
يا ناس حبايب
يا ناس جيران
انا قلبى دايب
على البيبان
عجوز شويه
لكن عينيه
روحين حنان
لا ظنى سيء
و لا جبان
درويش و أسطى
و شيخ كمان
و فى عبى قطه
ازاى حتلعب
فيه الفيران
تسألنى باتعب
أقول صراحه
شقايه راحه
قوة حصان
لاجل و عشان
قبول عيالى
فى الامتحان
و انا فى بالى
حاجات جنان
من الطبالى
اعمل صيوان
و ابنى لخيالى
اربع حيطان
دا انا فى انتقالى
من اولى ساقيه
لسد عالى لقيت مكان
سيرى يا موجه
بالتكنولوجه
لبر الامان
المشى طاب لى
و الدق على طابلى
ناس كانوا قبلى
قالوا فى الامثال
(( الرجل تدب مطرح ما تحب ))
*
و انا صنعتى مسحراتى فى البلد جوال
حبيتو دبيت كما العاشق ليالى طوال
و كل شبر و حته من بلدى
حته من كبدى
حته من موال
لو ماشى فى الصحرا شُفت النور اقول انسان
دا انا كل شباك يقيد اشكر لإيد انسان
و اقول هدتنى المناير سَبَّحت للعرش
يا رب من رحمتك مكنت للانسان
يغير الضلمه اما النور ما يتغيرش
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 9:09 pm

شاعر الشعب
شاعر الشعب اللى اعلى من الهرم
بافتكر نفسي حمامه من الحرم
دحرجتنى على فدان الكرم
حكمه راكبه تغنى فى القطر السريع
كل شخص من الزمان اللى اترحم
لما يدخل فى زمان المشاريع
لو يِرَقَص حاجبه من فرط الألم
لم يُلَمْ بالمثل يا عبد الشفيع
إن يَرُدّ الصاع ألفاً لم يُلَمْ
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 9:11 pm

كُتُبْ و ناس
مسحراتى قديم جديد
منقراتى خفيف شديد
فاتح مدارس على السحور
و طبلتى طبلة الحضور
خدت الثقافة على اساس
ان الثقافة كتب و ناس
قريت لطـه و للحـكيم
و لعم بيرم و للنديم
و من المعرة على بولاق
ابو العلا من ابو العلاء
شفت الجَميل يشكر الجِميل
فى كل حته و فى كل جيل
من فننا جاءت الفنون
من شاعرٍ جاء شاعرون
و من تراث لنا عريق
شيوخ اوربا على الطريق
و مشيت فى شارع نور الظلام
و شفت لك يا عبد السلام
اتمنى راجل زيك امير
الفجر ابيض زى الضمير
المشي طاب لى و الدق على طبلى
ناس كانوا قبلى
قالوا فى الامثال
الرِجل تدب مطرح ما تحب
و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :
قلت المحبه و قلت المعرفة قسمه
و خدت عودى و كان عودى ربيع نسمه
اصبّحه بالليالى و يجرى فى النجمه
انا قريت البلد و الفجر و الانسان
و انا اتبعت الضحى وحدّثت بالنعمه
الرجوع الى أعلى الصفحة اذهب الى الأسفل
http://amoaagsherif.ahlamontada.com
شريف الحكيم
عضو فعال
عضو فعال
avatar

عدد المساهمات : 4044
تاريخ التسجيل : 19/12/2009

مُساهمةموضوع: رد: فؤاد حداد الاعمال الكاملة 45 قصيدة ( المسحراتى ) الجزء الاول   الثلاثاء فبراير 09, 2010 9:13 pm

الإستيمارة
اصحى يا نايم
وحّد الدايم
و قول نويت .. بكرة ان حيت
الشهر صايم و الفجر قايم
اصحى يا نايم وحد الرزاق
رمضان كريم
***
مسحراتى منقراتى
ع الطبلة ايدى
ريشة فى دوايتى
اسمع يا سيدى
اسمع حكايتى
مع استيمارة
راكبة حمارة
اوّل ما راحت
راحت لحسنى قالت
يا حوستى
هو انت فاطر
قال : كنت فاكر
مش حانسى تانى
خليك مكانى
الاستيمارة
راكبة الحمارة
راحت لفكرى
قال: تيجى باكر
وتروح لزكرى
قال: روح لشاكر
والاّ لشكرى
شكرى فى اجازة
راحت لبهجت
لا حط ماذا
ولا سألها
أَشَّرْ نقلها
راحت لهانى
خليك مكانى
هانى الطاطورى
قال: فيما يبدو
راحت لعبده
لازم ضرورى
ضرورى لازم
راحت لحازم
منه لتيفه
شاغلاه لطيفه
منه لمكتب
راجل
مؤدب
ببدله بنى
قال لى أظنى
فى تانى اوده
عند الموظف
ابو بدله سودا
بدله رصاصى
قال لا مؤاخذه
مش اختصاصى
يا سيدى لاظوغلى
خلصلى شغلى
فى تانى طرقه
على شمالى
لبدله زرقا
شَرَحْت حالى
قال ثانية واحده
والاستيماره
من يومها قاعده
راكبه الحماره
لو كنت راكب
ما كنتش اوصل
ولا اؤدى واجب
ولا احصّل
واطلع بلاشى
احسن لى افضل
على مهلى ماشى
اصحى يا نايم وحد الدايم
السعى للصوم خير من النوم
ده ليالى سمحه نجومها سبحه
اصحى يا نايم
يا نايم اصحى
وحــــّـــد الرزاق
الرجوع الى أعلى الصفحة اذهب الى الأسفل
http://amoaagsherif.ahlamontada.com
 
فؤاد حداد الاعمال الكاملة 45 قصيدة ( المسحراتى ) الجزء الاول
الرجوع الى أعلى الصفحة 
صفحة 1 من اصل 3انتقل الى الصفحة : 1, 2, 3  الصفحة التالية

صلاحيات هذا المنتدى:لاتستطيع الرد على المواضيع في هذا المنتدى
أمواج الأندلس أمواج عربية  :: القاعة ألادبية :: * ألمسحراتى *-
انتقل الى: