| | مسحراتى لاشهر الشعراء وكل يوم مسحراتى جديد |  |
|
+9مصطفى المصرى ساميه د / عبد الرحمن محمد أبو نظارة أميرة الورد هدير الحكيم د / أية شريف الحكيم الجبالى 13 مشترك |
|
| كاتب الموضوع | رسالة |
|---|
الجبالى
عضو مميز
عدد المساهمات : 144
تاريخ التسجيل : 03/05/2010
 |  موضوع: مسحراتى لاشهر الشعراء وكل يوم مسحراتى جديد  الثلاثاء أغسطس 10, 2010 9:49 pm | |
| شعر يحيى ابراهيم  مسحراتى منقراتى والدق على طبلى
هليت يا رمضان يا مجمع الأحباب
والدق دا طاب لى
يا شهر صوم وليلة قوم وتروايحه
بتطيب لى
عندى أربعين ومن تلاتين أبويا طب طب لى
وقال لى صوم يا حبيبى قوم دا صومك دا هيطيب لى
يا مصر يا أم المنارة والجسارة غير نيلها ما طاب لى
مسحراتى منقراتى والدق على طبلى
يا أبو إسماعين مين زيى مين أبويا خطب لى
ودخلتى فى العيد فينك يا عم سعيد فى الفرش شطب لى
دنا صايم رمضان وملايكة الرحمن
فى ذنوبى تشطب لى
اصحى يا عم سميح سمعنى دى التواشيح
وشح وطيب لى
قوم بقى يا نيمان قوم وحد الديان
واسمع غنا طبلى
دا من زمان رضوان وملايكة الرحمن
فتحوا باب الريان دا مين يكون قبلى
دى جنة الصايمين حرام على الفاطرين
اصحى يا عنتبلى
لفيت أنا لفيت فى مصر رحت وجيت
ومن عمارة لبيت من بحرى لقبلى
وفى الدول حطيت رحالى واتوضيت
اسحر هناك أهلى
فى تونس الخضراء سحرت أحبابى
فينك يا أبو رقيبة يا ريحة أحبابى
على زين العابدين نورها هندسها
خلاها زينة العرب طور مدارسها
يا تونس الخضرا القلب يهواك
بأهلك الكرما أنا دوبت فى هواك
وفى السودان الجميل طولت فى غيابى
وف ليبيا سحرتهم فى عزى وشبابى
وفى اليمن حبونى ودقوا على بابى
الأردن يا نور النبى مشيوا فى ركابى
وفى مكة أرض النبى بوست خطى أحبابى
أبو بكر وياه عمر وعلى وعثمان
وزرت أرض النبى ونسيت هنا عذابى
وفى الكويت برضه رحالى أنا حطيت
وفى العراق مقصدى بعد ما حجيت
وفى الجزاير ولو إنى أكيد زعلان
برضه سحرتهم وع ع النبى صليت
أما أنت يا فلسطين دى قصة ورواية
فى كل ساعة سحور بطولة ويايا
يا أرض الأقصى السليب وتالت الحرمين
يا صايمين الدهر يا غزة يا غالية
ليك فى قلوب العرب يا غالية بالعزة
فى المغرب كمان أنا رحت
لجل ما أسحرهم توهت فى جمال حبهم
وشغلتنى أنوارهم
كل البلاد بلدى فيها أنا لفيت
لكن يا مصر يا غالية رجعت تانى وجيت
ما لقيتش غير نيلك دا بيطيب لى
وألق طاب لى والمشى على طبلى
ناس كانوا قبلى قالوا فى الأمثال
الرجل تدب مطرح ما تحب وأنا صنعتى مسحراتى فى البلد جوال
جوال على كتفى ألف شوال والطبل بيطيب لى
واكمنى طنطاوى للفن غاوى أحكى حكاوى
وأقول يا بدوى شى لله يا عدوى ياعز الدين أبو الرجال
فى طنطا لفيت ع الطبلة رنيت أسحر نسا ورجال
وأقول يا رمضان يا مقيد الشياطين
رب العباد قسمك وفى صومك يما أحسنك وهنيا للصايمين
عشرة رحمة للى صامه وفى ليله قامه يا حسرة النايمين
وعشرة غفر للذنوب ويمسح ذنوب من كانوا يوم عاصيين
وعشرة عتق من النيران وبابه الريان ممنوع على الفاطرين
يا رب وبعودة وتكون سنة بيضاء آمين يا رب آمين
لو تدرى دى الأمة بركات الكريم رمضان
لتقولها بقلوبها يا رب السنة كلها رمضان
اصحى يا نايم وحد الدايم وقول نويت بكرة إن حييت
م الفجر صايم واصحى يا نايم وحد الرزاق
ورمضان كرررررررررررررررررررررريم
| |
|
 | |
شريف الحكيم
عضو فعال
عدد المساهمات : 4068
تاريخ التسجيل : 19/12/2009
| | موضوع: رد: مسحراتى لاشهر الشعراء وكل يوم مسحراتى جديد السبت أغسطس 14, 2010 1:22 am | |
| مسحراتى
شعر مصطفى الجارحى
مسحرااااااااتى
بعد الصلاة على الرسول
دى ليلة تانية..
يالاَّ يا سامية.. صحِّى بتول
يا حسن يا لبنى.. زبادى جبنا
وجبنة جبنا.. وجبنا فول
مسحراتى فى التلمذة
عصفور بادور
فى العتمة أو فى نور شذا
شاطر مذاكر
زى العساكر.. سمعاً وطاعة
فاهم نصوصى.. آخر وداعة
وعشان ما خدتش دروس خصوصى
باخد جزا
وكل حبة تطوير مناهج
حذف وإضافة حفظ وأذى
يا حبيبتى بحتاجلك إذا ضاق البراح
يا حبيبتى بحتاجلك إذا تعب الجناح
قدمت سبتى ما لقيتش حدى ولا منتهايا
واتنين تلاتى شايلين صلاتى دائى ودوايا
وأربعائى سبق خميسى ودعائى جمعة وهكذا
يعدى يومى
أقول ده صومى.. أكيد نفع.
وارضى ضميرى
واتمنى خيرى.. يكون شفع.
ويوماتى اهاتى
إصحى يا أمة ولا من سمع.
ده الظلم عمَّ وحفظت "عمَّ" و"قد سمع".
بانصب بكسرة واجبة ولازمة كلمة بنات
وأجر ما لا ينصرف بالفتحة من دون التفات
جغرافيا اجغرف.. فى الرسم ازخرف
وانزل فى بير التاريخ وأغرف.. كل اللى فات
فى الكيميا كيمو وعبقرينو فى اللغات
فى الجبر جابر بسطى ومقامى يا هندزة
يا حبيبتى بحتاجلك إذا.. ضاق البراح
يا حبيبتى بحتاجلك إذا.. تعب الجناح
مسحراااااااااااااااااتى | |
|
| | |
شريف الحكيم
عضو فعال
عدد المساهمات : 4068
تاريخ التسجيل : 19/12/2009
| | موضوع: شعر مصطفى الجارحي السبت أغسطس 14, 2010 1:33 am | |
| شعر مصطفى الجارحي
مسحرااااااتى
بعد الصلاة على النبى
باقول بعودة
إصحى يا كيمو
يا عُمر يا حودة.. يا مغربى
يارماز ويارا
سلمى وتمارا
ماتصحوا سارة.. وزينبى
مسحرااااااتى
.............
عاشق الصحافة
جورنالجى يعنى
ضد الخرافة
تطول رقبتى
قد الزرافة
ساعة ما أكشف
آفة.. وفساد
يا حبيبتى إنتى ست البلاد
يا حبيبتى وانتى زرع وحصاد
فى حفرة ولاّ
على أعلى تلة
حاشا وكلا
إن قلت إلا
حق وما خافشى
فرعون ثمود
صهيون وعاد
يا حبيبتى إنتى أم الولاد
يا حبيبتى وانتى أجمل ميعاد
مسحرااااااتى
..............
عاشق أرارى
والعشق كارى
واخترت جارى
من قبل دارى
رسمالى طبلة
وصوتى نبلة
تنش الجبان
يا حبيبتى إنتى بر الأمان
يا حبيبتى وانتى حب وحنان
لبست عمة
ولاّ جاكتة
على رجلى ماشى
بلا بسكلتة
لكن عنيا
ستة وستة
شايفة الميدان
يا حبيبتى قومى آن الأوان
يا حبيبتى هبى لبى الأدان
مسحرااااااتى
مسحرااااااتى
مسحرااااااتى
| |
|
| | |
د / أية
مراقب عام
عدد المساهمات : 358
تاريخ التسجيل : 03/03/2010
| | موضوع: رد: مسحراتى لاشهر الشعراء وكل يوم مسحراتى جديد الأحد أغسطس 15, 2010 1:14 am | |
| شعر *مصطفى الجارحى
مسحرااااتى
بعد الصلاةِ على نبينا الزين
خير البرية ابن عبد الله الأمين
ليلة جديدة..
يا فريدة.. اصحى وصحِّى حسين
ونادى إسراء وماهر ومصطفى وياسمين
وقولوا ناويين الصيام والقيام..
وأنا أرد آمين.
مسحراتى.. قصدت وجه كريم..
سواق ألف الشوارع ويَّا تاكسى قديم..
أحوالى مايلة..
وأشحت زبون بالمحايلة..
لو حتى قال "بهتيم"..
طول عمرى أبيض وإسود..
فى القاهرة مشهور
فجأة رمانى زمانى..
وانتهيت حنطور..
لما البلاد اتملت من كل شكل ولون
إيشى أصفر.. ابيض.. ولندن..
وشفتشى لحريم.
ما كفاهومش التكاتك ووقفة الإشارات..
ما كفاهومش غلاسة سواقين "الميكروبات"..
جايين يزيدوا الزحام زحمة فوق زحمة..
والدنيا عتمة.. فى عز الشمس يا حضرات..
والأسطوات ع القهاوى يشربوا شيشة..
من بعد وقف الحال اتحولوا لأغوات.
أنا كنت رمز لشوارع القاهرة خمسين..
ركوبة لابن الذوات عُمد وافندية..
من أغلى ماركة مرسيدس مع ستروين..
على كل ناصية تلاقينا عشرة مش ميّة..
دلوقتى هوندا ومازدا وميتسوبيشى وداتسون..
يعنى الخراب فى العجل.. مش بس بنى آدمين.
افرجها من عندك بقى..
لأجل النبى يا كريم..
تعبنا حيرة وشقا..
ومرمطة وتلطيم..
على أكل عيشنا سعينا..
وغيرك أنت ما فيش..
والرزق منك إلينا.. يا عليم بينا..
ده إحنا غلابة قوى والذل ما يرضيش..
مسحرااااااااااااااتي..
مسحراااااااااااااتي..
مسحرااااااااااااتي.
| |
|
| | |
هدير الحكيم
مراقب عام
عدد المساهمات : 190
تاريخ التسجيل : 23/07/2010
| | موضوع: رد: مسحراتى لاشهر الشعراء وكل يوم مسحراتى جديد الإثنين أغسطس 16, 2010 2:56 am | |
| "الشهيد"
شعر: مصطفى الجارحى
مسحرااااااااااتى..
بعد الصلاةِ ع المصطفى العدنان..
اصحى يا سيد يا صابر..
يا مرسى يا عثمان..
وصحّوا هالة وكوثر..
وسيدة وحنان..
رمضان ده شهر الكرم
والرحمة والإحسان..
وكفاية إن الإله
أنزل به قرآن..
للناس عبادة وهدى
وتوبة مع غفران.
..................
قلبى انكسر م الألم..
عقلى صحيح بيتوه..
خالد سعيد متهم..
والاَّ برىء قتلوه..
خالد شهيد اسكندرية..
أم شهيد بانجو..
وعايزنى أرقص ضحية..
والاَّ ارقص التانجو..
إدينى عقلك وقولى
إيه بس أكرم لى..
أقف مكانى أعانى
وأهتف بكل الأغانى
والاَّ أكون الأنانى..
واهرب عشان أنجو.
.............
معرفش ليه افتكرت
اخواتنا فى فلسطين..
هناك عساكر صهاينة
حربهم للدين..
واسمه احتلال يا جدع
م الأصل مختلفين..
أما هنا فـ مصرنا
عسكر فى بنى آدمين..
العسكرى من دول
بصمجى وأمى..
يلبسوه أفرول
يضرب ولا يسمى..
يقلعوه أفرول
يشرب قوام دمى.
................
معرفش ليه افتكرت
فيلم "البرىء"
وقعدت أترحم على
"عاطف" وشفته جرىء..
إكمنه شاف الحقيقة
بدرى وسجلها
من غير مواربة ولا
زخرفة وتجميل..
من يومها شلنا على
الكتف حمل تقيل..
نقوم من النوم نبلبع
قرص خوف على الريق.
.....................
خالد سعيد اتقتل
يا مصر كام خالد
فيكى هيدفع تمن
حريته بالموت..
خالد سعيد اتقتل
كل شىء وارد
طول ما السكوت شلِّنا
وحبسنا جوه بيوت..
مسحراااااااااااانى..
مسحراااااااااااتى..
مسحرااااااااااتى. | |
|
| | |
أميرة الورد
مراقب عام
عدد المساهمات : 911
تاريخ التسجيل : 11/07/2010
| | موضوع: رد: مسحراتى لاشهر الشعراء وكل يوم مسحراتى جديد الإثنين أغسطس 16, 2010 1:02 pm | |
| شعر : عبد المجيد راشــــد
مسحراتى
بصرخ ليلاتى
على طبلة صوتها
آنين ناياتى
أصحوا و فوقوا
لكل آتى
أوجاعنا جارحة
و دموعنا سارحة
أوضاعنا شارحة
من غير ما هاتى
****
يا مر روحى و حلقى
من علقم الأيام
كل الجراح بتطيب
و جرحى ما بينام
سنين تجر سنين
و أنا وحدى
مش لاقى حضنك
و لا صوتك
مش لاقى شكلك
و لا ملامحك
و لا همسك
ولا سكوتك
مش لا قى حنيتك
و لا حقى من قوتك
مش لاقى غير خفافيش
عايشه فى ظلام ليلك
خطفاكى من حضننا
و من سنين عمرنا
و من ربيع حلمنا
و من ضيا فجرنا
حرماكى من قولك
منعاكى من دورك
قاطعة حبال نولك
و معيشانا ف هم
و جرح ما يتلم
صبح و مسا فى الغم
باعوا العرق و الدم
خفافيش و هجموا
فى ضلام الليل
حاصروا الفرات و النيل
و الحلم قلبه عليل
من حمل أتقل م الجبال
أجيال ورا أجيال
و من عرابى لجمال
و من نضال لنضال
لساك يا حلم الرجال
بتحرك الساكن
و بترفع المبتدأ
تجر عشاقك
و تضم أحبابك
على خطى العصيان
و نوبة م الصحيان
تهل و تغطى
كل النجوع و الكفور
و الحوارى و المدن
تعدى و تخطى
و الصوت يهز الميدان
الخطوة مش مستحيل
و لا الطريق مقفول
مسحراتى و بقول
الظلم حتما يحده حد
مهما الجراح تشتد
مهما الصراع يحتد
مهما الطرق تنسد
لكل جزر مد
و لكل ليل فجره
و لكل عتمه نهار
بعزيمة الأحرار
من كل حى ودار
صوت الجموع هدار
يهد أعتى جدار
و يهزم الأشرار
و مهما زاد البعاد
صوت الجموع
له آوان ومعاد
مسحراتى بطول البلاد
اصرخ ليلاتى
اصحوا و فوقوا
لكل آتى
رمضان كريم
شهروعظيم
فيه العظات
و المعجزات
و الانتصار
الفجر لازم يولد نهار
و الصبح مولود من نور و نار
مسحراتى
و فى انتظار
الأمة ترفع
راية انتصار
رمضان كريم
يا نايم اصحى
وحد الرزاق | |
|
| | |
د / أية
مراقب عام
عدد المساهمات : 358
تاريخ التسجيل : 03/03/2010
| | موضوع: رد: مسحراتى لاشهر الشعراء وكل يوم مسحراتى جديد الثلاثاء أغسطس 17, 2010 4:50 am | |
| شعر: مصطفى الجارحى
مسحراااااااااااتى..
بعد الصلاةِ ع النبى المختار.
إصحى يا عبد النبى
صحِّى رضا ومرتضى..
صحِّى هدى وأفكار.
لابد نيَّة وسحور
علشان يصح فطار.
..................
أنا من صباح ربنا
من سبت حتى خميس
فوق الرصيف فرشتى
قاعد أبيع فوانيس..
بس انت شرَّف ناحيتى
واسأل على إدريس
وألف واحد يدلك
لو تهت فى العنوان.
أنا من زمان الزمان..
كان رزقى دايماً هنا
محفوظ لى فى رمضان..
وم السنة للسنة
أبدأ مع شعبان..
................
كفى اليمين فى القزاز
كفى الشمال فى الصفيح
تفرح وشوش العزاز
فياخدنى طرب المديح
من إيدى تطلع تحف
فوانيس دى والاَّ نجف
أم شمعدان ألوان
................
كان ليَّا شنة ورنة
وصنعتى على كل لسان
حتى اسألوا فوانيس أختى
اللى اسمها دايماً "إحسان"
................
دلوقتى فوانيسكم عيرة
وخيبتكوا بالويبة كبيرة
واسمها فوانيس صينى
يا حبيبتى ليه بتعاتبينى
وما عادش منى غير السيرة
وأنتيكات مالية حصيرة
ولسه برضه باقول فنى
ما يقدَّروش غير الفنان..
وعمرى ما هخاف على رزقى
الرزق عند الله متصان..
ما انا أصلى أباً عن جداً
مؤمن قوى وكمان إنسان.
| |
|
| | |
محمد أبو نظارة
المدير العام
عدد المساهمات : 1748
تاريخ التسجيل : 30/01/2010
| | موضوع: رد: مسحراتى لاشهر الشعراء وكل يوم مسحراتى جديد الأربعاء أغسطس 18, 2010 1:59 pm | |
| مصطفى الجارحى
مسحرااااتى..
بعد الصلاةِ على النبى الهادى..
اصحى يا عيد يا سعيد
يأبو الوفا ونادى
على بثينة وسعاد
على أمينة ونهاد
على ثريا وشادى
بنوتة جاية
شاورت علىَّ
فى عنيها غيَّة.. والاَّ رسالة
قالت: بهية
اللى هيَّة هيَّة
ماعادش فيها.. جناحين عدالة
حكاية تشبه
لوحات بيكاسو
تخش سيما
تقطعها ترسو..
من غير مؤاخذة
تلاقيك فى صالة
الشاشة فيها الحياة محالة
كل الأناجر
طبيخ وطاهى
طاووس وريشُه
منفوخ وزاهى
غطروس مغطرس
على المنصة
جلس يدبدب
محامى لبلب..
لقيته أخرس
فى حلقة غُصَّة
مكسورة باصة
عنيه تجاهى..
دعيت إلهى
وأنت جاهى
إبعد أذاهم
فرد شيشُه..
قام كل عنتر زمانه
راكب على رأس جيشه
شهر حسامه..
أطلق سهامه..
خش اعتصامه
وسن طيشه..
وقال كرامتى
ما هيش شوية
رد الضحية
عندى قضية
واهل الشهامة
شايفينها هايفة
جايز عيونى
ماعادتش شايفة
حبيبتى كشِّت
فى ركن خايفة.
مصر السماحة
فيها بصراحة
حاجات تجنن
طلبت حقى
رد ببجاحة
وقال "يحنن"
مشيت وحالى
مش هوَّ حالى
زى البهيمة
فوق الطوالى
قالتلى ريما
إسمع يا خالى
ما عادش والى
ولا ولية
لا تقوم تسحر
ولا تبحر
وعندى شغلة
منيماتى.
مسحرااااااااااااتى..
مسحراااااااااااتى..
مسحراااااااااااتى.
| |
|
| | |
شريف الحكيم
عضو فعال
عدد المساهمات : 4068
تاريخ التسجيل : 19/12/2009
| | موضوع: رد: مسحراتى لاشهر الشعراء وكل يوم مسحراتى جديد الخميس أغسطس 19, 2010 1:06 am | |
| مسحراتى..
بعد الصلاةِ على خير البرية
طه رسول الإنسانية
اللى الغمامة
حطَّت على راسه بسلامة
وجابت النسمة طرية
إصحى يا زينب يا فوقية
يا رزق يا أسطى عطية
إصحى يا سيد شفيق.
...............
طليت عليَّا
لقيتنى عيل برىء
جوة المظاهرة شفتنى
باهتف جرىء
تنزل على راسى العصاية بغرزتين
شهور وعدت يا مبجل.. قول سنين
ولسه ما اتغيرش شئ.
إصحى يا سيد شفيق.
.................
شفتهم فى "رُد قلبى"
يهتفوا للجمهورية
لما عبواحد نطق
"تحيا مصر" ماهيش وسية
شفتهم فى تسعة يونيو
يهتفوا ضد التنحى
يرجع الريس يضحى..
والجميع يطلع يبارك.
شفتهم فى خلِّى بالك
يشتموا فى البت "زوزو"
من ساعتها لقيتنى طالع
صوت جهورى وجسم فارع
مرة أهتف ضد "أهلى"
مرة أكون ضد "الزمالك"
كل ما يقولوا مظاهرة
أبقى جوَّه الزحمة سالك
أجرى وأشعلها حريق.
إصحى يا سيد شفيق.
.................
ثورجى راكبها دايماً بالهتاف
قالوا صوتى حلو أطعم م الخشاف
لو فى يوم تسأل عليَّا
بص دايماً ع الكتاف
هتلاقينى جوّه كادر فـ قلب صورة
ماتش كورة.. أو محاكمة لواد جاسوس
الحكاية مش فلوس.. ولا يحزنون
إنما غاوى وبـ انقَّط بالزعيق.
إصحى يا سيد شفيق.
..................
مش باقولك من سنين
بح صوتى وشعرى شاب
ياما قالوا وكتبوا عنى
طرت ومشيت ع السحاب
بس فقت لقيتنى واقف
مطرحى مرعوب وخايف
والمصيبة إنى عارف
إنى محبوس مش طليق.
إصحى يا سيد شفيق.
مسحرااااااتى..
مسحرااااااتى..
مسحرااااااتى.
| |
|
| | |
د / عبد الرحمن
نائب المدير
عدد المساهمات : 1195
تاريخ التسجيل : 31/03/2010
| | موضوع: رد: مسحراتى لاشهر الشعراء وكل يوم مسحراتى جديد الجمعة أغسطس 20, 2010 2:56 am | |
|
مسحراتى..
بعد الصلا على سيد الكونين
الصادق الهادى الأمين
جات له الغزالة بضناها
تمنع دموع الحُسين
اصحى يا محسن يا زين
يا سيدة وياسمين
وجب السحور يا رجب
صحِّى على وأمين.
.................
الدنيا حر ورطوبة
يعنى عز الصيف
لا ضل نافع ولا
مروحة وتكييف
وأنا مهنتى فران
حتى فـ نهار رمضان
بارمى فى طاقة نار
قرص العجين خمران
يرد ليَّا رغيف
أحمر فى لون مرجان
يخطف عيون الضيف
..................
الصهد زى الرعد يلفحنى
وتبص تلمحنى
الضهر محنى.. لكنى عفى وسدَّاد
يقولو لى افطر يا واد
شغلتك صعبة
أقول ده رب العباد
بشَّرنى بالكعبة
أقول ده رب العباد
كافينى ميَّه وزاد
بشرنى بزيارة
يقولولى ولع سيجارة
رخصتك وياك
أضحك وعينى فـ آخر الزحمة
أسمع زعيق الخلق فى الحارة
اللى بيصرخ يا عالم
خلِّى فيه رحمة
واللى يقول الشمس حامية جبارة.
.................
وأنا فـ طابونة يوماتى
قول جهنم حمرا
عرقى يسيل فيضان
وشِّى كما الجمرة
تسأل عن الحر أقولك
أنا فران
تسأل عن البرد أقولك
ضعيف دبلان
اكمنهم لاتنين
جوايا متساويين.. مع إنهم ضدان
زى الضرير.. فى أى وقت يسير
ضلمة ونور يتساووا فى المشاوير..
ضلمة ونور عند الضرير سيان.
مسحرااااااتى..
مسحرااااااتى..
مسحرااااااتى.
| |
|
| | |
د / عبد الرحمن
نائب المدير
عدد المساهمات : 1195
تاريخ التسجيل : 31/03/2010
| | موضوع: رد: مسحراتى لاشهر الشعراء وكل يوم مسحراتى جديد الجمعة أغسطس 20, 2010 11:10 pm | |
| مسحراااااااتى..
بعد الصلاةِ على نبينا
يوم القيامة والينا.. وشفيع فينا
من تانى أصلِّى.. واسلَّم على اللى
سيرته شفاء للداء
ياما اعتكف يا مسلمين.. فى غار "حراء"
بحثاً عن السرَّاء.. ويَّا جبريل الأمين
وشاف بعينه المعجزات: خلق ونشور
حفظ فى صدره المعرفة والنور
ثم استخبى فـ "ثور"
تشهد عليه "أسماء"
يشهد عليه راعى الغنم عبد الله
يمسح أثرها بأرجل الأغنام
يشهد بُكا الصديق اللى عينيه لم تنام
اصحى يا حاج حسام
يا مُعتمد يا إمام
يا مريمى ومرام
يا أم العيون نجلاء..
أنا اللى وارث مطبعة فى بولاق
تطبع كتب أخلاق
أشعار أبى تمام
طوق الحمامة وسيرة ابن هشام
وألف ليلة وموطأ مالك
فجأة لقيت الجو ازرق على اسود حالك
صدَّى المكن منِّى وأصبح هالك
صدىَّ المكن من ركنته بالعام
سمعت "ثومة" تغنى "ودارت الأيام".
.................
ياما شكر جدِّى فى "جوتنبرج"
لما يناديها تلاقيها قوام ترتج
ترقص تزغرد وتتلوى بدلال وبغنج
ويقولِّى يا ابنى أصيلة.. وشالت العيلة
ولا عمرها تشكو ولا تحتج
يمد إيده عليها.. ترد فيها الروح
وهوَّ يتخدر كأنه واخد بنج
ويقول أمانة يا ابنى لو تموت م الجوع
طيّب خاطرها عشان صوتها يكون مسموع
ده اللى يعاشرها هيعرف نُبل أخلاقها
صونها ونشِّف عرقها.. تلاقيها آخر طوع.
...................
شلت الأمانة نصيحة فـ ودنى تدَّلى
إيه اللى خلاَّ الزمن زى الغزال ولَّى
الكمبيوتر ظهر عفريت كما الجنّى
وبقيت أدلِّل عليها: مين يشترى منِّى
وعدَّى سنِّى هدر وصابتنى ميت علّة
عمرى ما شفت الكتب يقروها ع الشاشة
سيديهات فلاشة وقرف يا دنيا غشاشة
أكرم أموت م الجوع ولا أحيا بمذلة.
مسحرااااااتى..
مسحرااااااتى..
مسحرااااااتى.
| |
|
| | |
د / عبد الرحمن
نائب المدير
عدد المساهمات : 1195
تاريخ التسجيل : 31/03/2010
| | موضوع: رد: مسحراتى لاشهر الشعراء وكل يوم مسحراتى جديد الأحد أغسطس 22, 2010 2:21 am | |
| شعر مصطفى الجارحى
مسحرااااااتى..
بعد الصلاةِ على ابن آمنة وحليمة..
أكحل العينين طه..
كم جروح.. فى الروح داواها..
صاحب المُثل الكريمة.
رق قلبه زى طير..
منتصر لكن كسير..
حين رأى قلادة "خديجة"
اللى رحلت.. بين إيديه
الدموع ملأت عينيه
فارتضى حكم الصحابة
أطلقوا "العاصى" الأسير.
رجعوه لأم الغلابة..
ستنا أم العواجز..
اللى دعوتها مُجابة..
واللى جوَّه الروح مقام.
اصحى يا عباس ونام
اصحى يا محسن واشرب..
بل ريقك يا عصام.
وانتى يا تسنيم يا يثرب..
من هنا لمغرب صيام.
عربجى ع الكارو أنقل..
يوم تحف وكتير حطام.
يوم فواكه يوم خضار..
عربجى بس بمزاجى..
واسألوا صاحبى الحمار.
اللى انا مربيه حصاوى..
جبت له أجمل حداوى..
تجرى ع الأسفلت نار.
رحت أجيب عمة وطاقية..
غصب عنى لقيت إيديَّا..
تشترى سرج ولجام.
علِّى صوتك يا مدام.
العِزال ده لأنهى دور؟
ننقله بعد الفطور..
وإلاَّ فى بدر التمام؟
مش هاقول تدينى كام.
فى "الخليفة" اسأل تلاقى..
اسمى زى الطبل راقى..
روح ضواحى الجيزة
روح.. مصر القديمة..
هتلاقينى نجم سيما.
شهرتى نفسى العزيزة..
اللى ما تنذل أبداً
اللى مش ممكن تميل.
أتفق بجنيه وأشيل..
الجنيه يبقى بريزة..
تنتفض فيَّا الغريزة.
أشترى الطبع الأصيل..
زعلى ما يبان ع الملامح..
حتى لو عرقى يسيل.
حتى لو عرقى اتسرق..
حقى ممكن فيه أسامح..
بس حق حمارى لأ.
مسحرااااااتى..
مسحرااااااتى..
مسحرااااااتى.
| |
|
| | |
د / أية
مراقب عام
عدد المساهمات : 358
تاريخ التسجيل : 03/03/2010
| | موضوع: رد: مسحراتى لاشهر الشعراء وكل يوم مسحراتى جديد الإثنين أغسطس 23, 2010 1:11 am | |
| مسحرااااااتى..
بعد الصلا فى كل آن
والسلام فى كل حين..
ع اللى عمره ف يوم ما خان
صان عهوده طول سنين..
ابن "عبد الله".. "إسماعيل"..
الذبيحين اللى نجيوا
بالفداء يا موحدين..
اصحى يا أسطى ياسين
اصحى يا صابر يا جابر
اصحى يا نرجس يا سندس
لسَّه فاضل حبِّتين..
حبِّتين والفجر يدن
ما تقولوش أنا كنت فين.
...............
مسحرااااااتى..
داخل بقلبى اليمين
ع الشعر يا سيدى..
داخل بلا مستعين
شفت البساط أحمدى..
وأخدت حصة بيان
أعقبها حصة أدب..
بارسم هلال شعبان
من بعد طلعة رجب..
قال لى أوانك وجب
بس ابتدى فـ رمضان
مقبولى بقى ممتاز
ما شكرتش الأستاذ
ع المنة والإحسان
ولا هوَّ رد بغضب.
...............
الشعر شيخ العرب
جدِّى فؤاد حداد
العلم قال للأدب
علِّمنى أبقى بلاد
زيَّك بروح صافية
ينده لنا ياولاد
مين يدخل القافية
أدخل معاه أجاريه
أبرم على دماغى
يقول لى يا ابن الإيه
عصفور على صداغى
قلت اللى جاب داغى
لا قرشى ولا صاغى
يا عمنا معذور
من رمش بيلاغى
رجعنى للعصفور
يطيره والاَّ
يقص ليه الريش
مديت بإيد قلة
والتانية فتحت شيش
وشاورت ع الضلة
وقلت سيبه يعيش
لو حتى يتسلى
قال شعرى بالاتفاق
ما هوش مجرد قسيمة
أحلاه ما قلَّ دلَّ
فقلت قيمة وعزيمة
خلاَّ الجبلَّة أذلَّة
وجماله له ملة واحدة
والكدب له ألف ملة.
مسحرااااااتى..
مسحرااااااتى..
مسحرااااااتى.
| |
|
| | |
هدير الحكيم
مراقب عام
عدد المساهمات : 190
تاريخ التسجيل : 23/07/2010
| | موضوع: رد: مسحراتى لاشهر الشعراء وكل يوم مسحراتى جديد الثلاثاء أغسطس 24, 2010 12:54 am | |
| شعر: مصطفى الجارحى
مسحرااااااتى..
بعد الصلا على سيدى
صاحب القلب الكبير
اللى أنا بـ حُبه أسير
واهتدى بيه واقتدى
حتى لو فى الضلمة أسير
الحبيب لما تجلى
فى المنام القلب صلى
إذ تيمَّن يستجير
اصحى يا تيسير صيامك
يبتدى بعد السحور
اصحى يا مختار.. يا نور
قصتى بين السطور
خدها عبرة للحياة..
بالزجل على وزن بيرم
فيها ذكرى وفيها آآآآه
رحت يوم أخطب فتاة
شفتها مرة فتاة..
عقلى فيها بنظرة أولى
صاحبى سيد قال لى ياااااه
يا إبراهيم دى بت حوله
قلت له لكن رجولة
هاعمل إيه بس بعينيها
بت فرد وطول وعرض
رحت بيتها وشلت ورد
وزَّعوه ساعة بطولة
كان فريق الأهلى فيها
ضد فرقة إفريقية
كانت الجماهير مهولة
والعدد مالهش حصر
يقولوا أهلى.. تحيا مصر
يهتفوا بنشيد بلادى
وإحنا شايلين ع الأيادى
ييجى طن زهور وورد
زبالين والدنيا برد
................
رحت وطلعت السلالم
فين يا ابنى الحاج سالم
شقته فى أنهى دور
بص لى من فوق لتحت
والعيون بتقول لى غور
ع السطوح ارحمنى يا اسطى..
سابنى وانا عندى زُغطَّة
الزبالة ف كل بسطة
حتى طالة من المناور
فى الصفايح ألف قطة
من بعيد ندهت لى "بطة"
واقفة عند الباب تشاور
بس بتنفض كليم..
بص أبوها وقال لى عندك
أوعى تطلع يا بهيم
حلفت بالله العظيم
إن أنا اسمى إبراهيم
قال لى خطوة تلاقى نفسك
رحت على أقرب حكيم
يالاَّ يا زبال فارقنا
ليك طريق ماهوش طريقنا
قلت له زبال صحيح
وأنت يابا الحاج إيح
بلَّها واشربها يالاَّ
بكرة هتبور الحريم.
مسحرااااااتى..
مسحرااااااتى..
مسحرااااااتى.
| |
|
| | |
ساميه
وسام الاندلس
عدد المساهمات : 101
تاريخ التسجيل : 29/04/2010
| | موضوع: رد: مسحراتى لاشهر الشعراء وكل يوم مسحراتى جديد الأربعاء أغسطس 25, 2010 5:02 am | |
| مسحرااااااتى..
صلِّيت عليك يا نبى
هاتف دعانى وجيت
على كل بيت يا نبى
لاجل النبى لفِّيت
تسأل أقول مأربى
هوَّ الصلا ع الزين
خدنى الحنين لضياه
خدنى ما قلتش لفين
طيرٌ سلك فى مداه
عرَّجت ع الحضرة
دفا وشفا ومحاياه
وغيطان كتير خضرا
إصحى يا عبد الإله
قومى يا سامية وسعاد
حسب الميعاد طبِّيت
ومضيت فى كشف حضور
آن الأوان اسمعوا
"الطبلخان" للسحور.
..................
صافى وزى الحتَّة البيضا
الحتَّة اللى بتشبه روحى
زى مشاعرى الطارحة بلابل
بتغنِّى واسميها جروحى
أرمى ف بطن الأرض تقاوى
أرمى غناوى.. قمر فـ سطوحى
أزرع واحصد قمح سنابل
قطن لمكة وعكا وبابل
خُضرة لحد خليجنا العربى
على أفريقيا تمد عوافى
ليه يا حبيبة القلب تخافى
ده انتى الكعبة ودمى طوافى
ليه يا حبيبة القلب جعانة
وانا بـ اشوى لك لحم كتافى.
.................
نايم خايف قمت جرئ
جيت وشربتك ماء ع الريق
جيت وشربتك زمزم وانتى
عينك نبع ف كل طريق
رطب النخل نده أباريق
قطعوا السكة على المخاليق
قطعوا السكة على الصايمين
مد يا صايم إيدك قول
بسم الله وصيام مقبول
بسم الله وحفظنا بدين
سر الصبر مع العارفين.
............
ليه يا سواقى الميَّه تجفِّى
خير الأرض ما عادش يكفِّى
قالت فين الميَّه يا عم
أرض شراقى بتشرب سم
قالت فين الميَّه يا خال
والموال بقى طعمه يغم
ياما صرخت طلبت نجاه
لما غرقت لحد الشوشة
بين سرطان وبذور مغشوشة
مين ينصفنى يا خلق الله
م اللى كوانى ما قلتش آآآه
اللى بيسرق عرقى وقوتى
قص لسانى حدفنى لموتى
خلاَّ حياتى بقت مأساة
مين ينصفنى يا خلق الله.
مسحرااااااتى..
مسحرااااااتى..
مسحرااااااتى. | |
|
| | |
مصطفى المصرى
نائب المدير
عدد المساهمات : 720
تاريخ التسجيل : 13/02/2010
| | موضوع: رد: مسحراتى لاشهر الشعراء وكل يوم مسحراتى جديد الخميس أغسطس 26, 2010 3:20 am | |
| مسحرااااااتى..
بابدأ صلا.. وسلام على
اللى انا ف سيرته أدوب
سيدى المنزَّه م العيوب
إصحى يا أيوب.. ونادى
كل مذنب كى يتوب
إصحى يا نادية يا نادى
يا سهير يا حاج ماضى
ربنا رب القلوب.
..................
أنا جيت أنجد
عند بيت عنايات
نادت صوانى القلل
على كوبايات شربات
زغاريد دى والاَّ نايات
طايرة من الشبابيك
يا قطن ما أجملك
يا قطن مين يشتريك
ويَّا القماش لو شيك
قالت لى أم العروسة
عايزة مراتب نوسة
منفوشة زى كانيش
والخُدَّاديات من ستان
والألحفة بكرانيش
وعايزة أجمل ما عندك
وعندى فوق أجرتك
يابو العيال بقشيش
فقلت سمعاً وطاعة
يا أم العروسة ياريت
فى كل بيت.. ألقى زيك
ده انتى اللى زيك مافيش.
...............
أنا أسطى سيد منجد
والقوس يبوس يسراى
فيه غرزة تطلع قصب
وغرزة زى الدهب
والتالتة من جواى
عقل البشر يا بشر
دلوقتى بقى نسَّاى
اعزمنى على كوباية شاى
أو بن بس على الريحة
اللى اتخدع بسفنج خلاص
ما عادش له نومة مريحة
اعزمنى على حجرين شيشة
خسِّيت بقيت خُف الريشة
من بعد ما كنت معلم
لا حد بالعربون سلِّم
ولا حد قال لى تعالى نجد
حتى فرح سامى وعيشة
يا قطن ياللى طويل تيلك
كان كل بيت بيغنى لك
دلوقتى طِفيت قناديلك
وانا خلاص شلت الفيشة.
...............
مسحرااااااتى..
مسحرااااااتى..
مسحرااااااتى.
| |
|
| | |
شريف الحكيم
عضو فعال
عدد المساهمات : 4068
تاريخ التسجيل : 19/12/2009
| | موضوع: رد: مسحراتى لاشهر الشعراء وكل يوم مسحراتى جديد السبت أغسطس 28, 2010 12:59 am | |
| مسحرااااااتى..
أبدأ صلاتى وسلامى
ع الهاشمى التهامى
له م الأسامى أسامى
لسه ما نعرفهاش
ما بين تلتمية وألف إلا ميَّة
ويجرى فـ دمانا وفى القلب عاش
محمد وأحمد وصادق صدوق
وعاقب مقفَّى وقاسم ضحوك
وهز العروش اللى تحت الملوك
فبانت عظمته فى غزوة تبوك
وربك كفى المؤمنين القتال
اصحى يا سامى يا عمدة وجلال
وصحوا صفية ورامى ودلال
أنا لو عليَّا ما ابطلش انادى
وأفضل أغنى ورقصى حلال
صياد سمك قلبى توكَّل
على صاحب الرزق العلام
اللى بيُمهل ولا يهمل
وعنيه لا تغفل ولا بتنام
صياد سمك ما اعرفش شطوط
على رزقى انا دايماً سارح
ومركبى ع الموج مربوط
ما اعرفش بكرة من امبارح
بين العواصف والنوَّات
أنا والقمر والصبر اخوات
بنصلى ونسبَّح أوراد
فى البحر ياما سهول ورياض
صياد سمك واصطدت بياض
واصطدت بلطى مع مرجان
أم الخلول على جاندوفلى
ما تمد إيدك واقطفلى
من الشجر فراشات ألوان
من الشجر أسماك زينة
على تمر هندى فسيخ شربات
خياشيم تزهَّر تحت الباط
بواريك براقع وإيشاربات
مناديل ورق تستنى عياط
وبنات بتمشى على الميَّه
وقلبى على طراطيف رجليه
بيغنى شوق على حنيَّة
ويسيب صوابعه لقشر البيض
والعسكرى يحبل ويحيض
عشان يلبسنى قضيَّة
فيها قلبى ماشى بعكس السير
مع إن قلبى بيتوكل
على صاحب الرزق العلام
اللى بيمهل ولا يهمل
وعنيه لا تغفل ولا بتنام
مسحرااااااتى..
مسحرااااااتى..
مسحرااااااتى.
| |
|
| | |
شريف الحكيم
عضو فعال
عدد المساهمات : 4068
تاريخ التسجيل : 19/12/2009
| | موضوع: رد: مسحراتى لاشهر الشعراء وكل يوم مسحراتى جديد الأحد أغسطس 29, 2010 6:13 am | |
| مسحرااااااتى..
بعد الصلاةِ على النبىِّ الأمى
عشقه بيجرى فى دمى
قال يا خديجة دثِّرينى
وزمِّلينى وضُمِّى
أوصى بأمك تلاتة
وقال ثم "أبوك"
لا تأخُذنَّك شكوك
ده الورد فتَّح بعرقه
من بعد ما كان شوك
كفه اليمين المسك
أما الشمال عنبر
فكَّر يا ابنى وتدبَّر
خد يا ابن آدم عظة
م المعجزة وكبَّر
فيه جذع شجرة أن
حين اتبنى المنبر
ملِّس عليه المصطفى
ووعده بالجنَّة
الجذع غنى وتثنَّى
من فرحته وعبَّر.
اصحى يا أيمن يا أيسر
اصحى يا مرمر زمانى
ونادى سوسن وهانى
معايا كبشة أغانى
وجاى ومبدَّر.
..............
من تانى أعود للزجل
بلا وجل أو خجل
أو حوجة للبتارين.
بياع درة فـ كل الميادين
طيِّب وأمين
فى كل شارع أو حارة
عند إشارة
قدام دكاكين.
..........
لو حد عدَّى
ألاقيه هدَّى
يتغدا.. تتهد المعدة
ما يباتش حزين.
..........
كمان يهل الجنتلمان
أبو جيب عمران
ويشترى ويبعد فرحان
يركب ليموزين.
............
بياع درة بيهوِّى بريش
وما فيش بقشيش
وتملِّى واقف ع الكورنيش
ينده عاشقين.
............
حبِّيبة عدُّوا على السكة
عدُّوا الفكَّة
القلب ع القلب اتَّكى
وقالوا له كوزين.
..............
وكان زمان م العام للعام
يظهر وينام
دلوقتى على طول الأيام
قاعدين فارشين.
..............
يعنى الدرة مش بطالة
حل بطالة
وآدى الحريم والرجالة
بينهم شبرين.
..............
يا بلدى دايماً محروسة
فـ خدك بوسة
إحنا اشتغلنا بدون كوسة
وكمان راضيين.
..............
بس انتى حوشى البلدية
كفاية أذيِّة
نكسب ونشترى طعمية
وبلاش بروتين.
..............
مسحرااااااتى..
مسحرااااااتى..
مسحرااااااتى.
| |
|
| | |
شريف الحكيم
عضو فعال
عدد المساهمات : 4068
تاريخ التسجيل : 19/12/2009
| | موضوع: رد: مسحراتى لاشهر الشعراء وكل يوم مسحراتى جديد الإثنين أغسطس 30, 2010 3:42 am | |
| مسحرااااااتى..
بعد الصلا ع الزين
طه رسول الله
اسمه يهز القلوب
والسر فى معناه
نطق الحصا بين إيديه
سبَّح بذكر الله
اصحى يا حاج ياسين
يابو النجا يا حسين
ونادوا سوسن.. بدور
وجب السحور.. انتباه.
..............
ضحَّكت طوب الأرض
بطول وعرض الزمن
ضحَّكت من غير تمن
والضحك سُنَّة وفرض.
بلياتشو وبوشِّين
فيه وش مش وشِّى
يا دمعتى كشِّى
قش الألم عشِّى
ولا عندى غير تفانين.
الروج على الوجنتين
أحمر كعرف الديك
الروح لها شبابيك
بافتحها من غير إذن
واعمل كأنى عبيط
وانسى الزعل والحزن
مع شقلبة وتنطيط
بالوهم أرسم حيط
واطلعها زى الجن
واعمل ساعات عصفور
زقزق لطلة نور
واعمل كمان مكسور
وتشوفنى أعرج بـ ازك
فى البحر أحدف قوارب
وأبقى مراكبى بشوارب
زى الكهارب تشك
وكأنى ساعة بعقارب
أول ما تيجى المغارب
أمشى واقول تِك تِك.
.............
بلياتشو يعنى المرح
شغلانتى أزرع فرح
زى اللبن مغشوش
باشا بدون طربوش
إكمنى ماشى ف حياه
ببسمة فوق الشفاه
شعرى طويل منكوش
وعندى ياما وشوش
ألبسها ساعة الدور
وأعدى ع الدكتور
أشكى له م التأتأة
يقول لى اضحك بقى
خد حبّتين تفاريح
لا حَس إنى جريح
ولا نصحنى بأجازة
ولا قال صحيح.. معذور
..............
مسحرااااااتى..
مسحرااااااتى..
مسحرااااااتى.
| |
|
| | |
محمد القروى
عضو مميز
عدد المساهمات : 24
تاريخ التسجيل : 28/08/2010
| | موضوع: رد: مسحراتى لاشهر الشعراء وكل يوم مسحراتى جديد الثلاثاء أغسطس 31, 2010 4:53 am | |
|
اصحى يا نايم .. وحد الدايم .. وقول نويت
بكره إن حييت .. الشهر صايم .. والفجر قايم
اصحى يا نايم .. وحِّد الرزاق .. رمضان كريم
***
مسحراتي .. منقراتي .. تحت القمر
قريت مسائل .. جاني الخبر .. ومن المدينة
والراشدينا .. فيما غبر .. أصل الحكاية
سمع شكاية .. مد البصر .. شاف الخليفة
أجسام ضعيفة .. زي الصور .. لو لسّه حية
عيونها حافية .. من النظر .. في نار تغلب
وإيدين تقلب .. ميه بحجر .. قالت باسلي
ولادي يا اللي .. تعرف عمر .. ومهما نشهق
لا بد نزهق .. من السهر .. يمكن يغيتهم
نعاس يميتهم .. قبل السحر .. سالت دموعه
وبين ضلوعه .. قلبه انفطر .. قال كل مسلم
جناحه مؤلم .. إذا انكسر .. شوف جسمه مايل
تحت الحمايل .. مد وصبر .. قالت شلت ذنبي
يغفر لي ربي .. لو يغتفر .. قامت قيامة
من اليتامى .. لما ظهر .. أبو المواجع
كأنه راجع .. من السفر .. جاب المؤونة
بإيدين حنونة .. وقال يا مصر .. أنا علىَّ
تخدم أيدي .. بدو وحضر .. ع الأرض دنه
ينفخ ودقنه .. بين الشرر .. الإنسانية
كلمة غنية .. دم وعبر .. أسلافنا هما
شقوا مداها .. فطرة وبداهة .. وخير أمة
نمشي بهداها .. على الأثر .. المشي طاب لي
والدق على طبلي .. ناس كانوا قبلي .. قالوا في الأمثال:
"الرجل تدب مطرح ما تحب" .. وأنا صنعتى مسحراتي في البلد جوال
حبيت ودبيت كما العاشق ليالي طوال .. وكل شبر وحتة من بلدي
حتة من كبدي .. حتة من موَّال: ..
يهديني طول المدى رؤيا الندى والطيف .. وقلبي ينزل على كل القبايل ضيف
يطلع من الحي رحلات الشتا والصيف .. ويشرب الطهر من زمزم براحاته
طابت جراحاته يا ساكن منى والخيف
***
اصحى يا نايم .. وحد الدايم .. السعي للصوم
خير من النوم .. دي ليالي سمحة .. نجومها سبحة
اصحى يا نايم .. يا نايم اصحى .. وحد الرزاق
| |
|
| | |
محمد أبو نظارة
المدير العام
عدد المساهمات : 1748
تاريخ التسجيل : 30/01/2010
| | موضوع: رد: مسحراتى لاشهر الشعراء وكل يوم مسحراتى جديد الأربعاء سبتمبر 01, 2010 12:59 am | |
|
مسحرااااااتى..
بعد الصلا على ناصر الحق بالحق
جواد سُراقة غرز وسُراقة قلبه رق
رأى بالعيون أنوار بتترجم الأسرار
نطق الشهادة وصار يضلل الكفار
صلوا على المختار نبينا بينا أحق
واللى يصلى عليه حتماً يلاقى نجاه
عرضوا عليه النفوذ
أغروه بسلطة وجاه
أقسم باسم الإله
لو وضعوا شمس وقمر
فى يمينه أو يسراه
لن يترك الدين وإن
يُهلك فِداه
لن يترك الدين وإن كان ابتلاء
إصحى يا رشدى يا محيى وعلاء
إصحى يا عالية يا راوية وصفاء
سحورنا ابتداء للصيام والدعاء
ورب السماء يستجيب إن يشاء.
.................
يغيبوا الأحبة وما يتنسوش
يغيبوا القرايب يغيبوا الصحاب
شيوخ أو شباب
ما بين الحنيِّن وبين البشوش
فمين اللى يقدر إذا الموت أتاه
يقول له تمهل ويرجو نجاه
يحاول يمد الإيدين أو يحوش
أنا وحدى أعرف بإن الحياه
مجرد عبث أو بكش أو فاشوش
وزفة ولادة وخفة نعوش
وإسأل إيديِّا اللى شالت ألوف
ولسه عنيَّا بتقدر تشوف
تراب المقابر يا ابنى عطوف
وجابر كسور الخواطر وطيِّب
بيقدر يغيِّب.. ويطرح كهوف.
شواهد عليها أسامى ورتب
هنا الموت يا ابنى لحد الرُكب
هنا الموت نادانى ويا للعجب
أنا مرمطون الشجون والدموع
مهندس جنون السكون والخضوع
على ضهرى طالع وضهرى بأتب
فمين بس يقدر يقول كم يعيش
ومين بس عنده يا مؤمن سبب !
..............
مسحرااااااتى..
مسحرااااااتى..
مسحراااااتى.
| |
|
| | |
أميرة الورد
مراقب عام
عدد المساهمات : 911
تاريخ التسجيل : 11/07/2010
| | موضوع: رد: مسحراتى لاشهر الشعراء وكل يوم مسحراتى جديد الأربعاء سبتمبر 01, 2010 1:34 am | |
|
بعد الصلاةِ ع المصطفى العدنان..
اصحى يا سيد يا صابر..
يا مرسى يا عثمان..
وصحّوا هالة وكوثر..
وسيدة وحنان..
رمضان ده شهر الكرم
والرحمة والإحسان..
وكفاية إن الإله
أنزل به قرآن..
للناس عبادة وهدى
وتوبة مع غفران.
..................
قلبى انكسر م الألم..
عقلى صحيح بيتوه..
خالد سعيد متهم..
والاَّ برىء قتلوه..
خالد شهيد اسكندرية..
أم شهيد بانجو..
وعايزنى أرقص ضحية..
والاَّ ارقص التانجو..
إدينى عقلك وقولى
إيه بس أكرم لى..
أقف مكانى أعانى
وأهتف بكل الأغانى
والاَّ أكون الأنانى..
واهرب عشان أنجو.
.............
معرفش ليه افتكرت
اخواتنا فى فلسطين..
هناك عساكر صهاينة
حربهم للدين..
واسمه احتلال يا جدع
م الأصل مختلفين..
أما هنا فـ مصرنا
عسكر فى بنى آدمين..
العسكرى من دول
بصمجى وأمى..
يلبسوه أفرول
يضرب ولا يسمى..
يقلعوه أفرول
يشرب قوام دمى.
................
معرفش ليه افتكرت
فيلم "البرىء"
وقعدت أترحم على
"عاطف" وشفته جرىء..
إكمنه شاف الحقيقة
بدرى وسجلها
من غير مواربة ولا
زخرفة وتجميل..
من يومها شلنا على
الكتف حمل تقيل..
نقوم من النوم نبلبع
قرص خوف على الريق.
.....................
خالد سعيد اتقتل
يا مصر كام خالد
فيكى هيدفع تمن
حريته بالموت..
خالد سعيد اتقتل
كل شىء وارد
طول ما السكوت شلِّنا
وحبسنا جوه بيوت..
مسحراااااااااااانى..
مسحراااااااااااتى..
مسحرااااااااااتى.
مسحرااااااااااتى..
| |
|
| | |
النبيل
عضو مميز
عدد المساهمات : 62
تاريخ التسجيل : 30/08/2010
| | موضوع: رد: مسحراتى لاشهر الشعراء وكل يوم مسحراتى جديد الأربعاء سبتمبر 01, 2010 5:11 pm | |
|
مسحراتى قضيت حياتى
لافف يوماتى على كل دار
أسمع كلامى وصانا طه
حسن المعامله لكل جار
ناقص ايمانه اللى جيرانه
من شره عانوا داقوا المرار
اكرم جيرانك
يكمل إيمانك
وتبقى بانى فى الخلد دار
طول عمر جارى
سترى وغطايا
وفى عز المى بيكون معايا
فى الضلمة هو شمس النهار
ابدا وصالح
جارك وسامح
رمضان دا اصله شهر التسامح والاعتذار
| |
|
| | |
د / عبد الرحمن
نائب المدير
عدد المساهمات : 1195
تاريخ التسجيل : 31/03/2010
| | موضوع: رد: مسحراتى لاشهر الشعراء وكل يوم مسحراتى جديد الخميس سبتمبر 02, 2010 12:19 am | |
|
مسحرااااااتى..
من بعد حمد الواحد الفرد الصمد
جانى المدد
صلِّيت على المحمود لقيت
عزوة وسند
رميت عينيَّا للمدى
قلبى شدا
الوِرد كان وَرد وندى
والوجد خدنى وابتدا.. كشف الحجاب
هنا اليقينُ ولا ارتياب
حضور ولكن فى الغياب
إصحى يا كابتن مُهاب
إصحى يا سلوى ورباب
إصحى يا مملوك يا غالى
إصحى يا محمد يا جالى
مع إنكم صاحيين يوماتى
بس جاى مسحراتى
قلبه شب وشعره شاب.
.............
مش مهم تكون عارفنى
المهم تكون شايفنى
بس دقَّق فى النواصى
ع الرصيف من غير كراسى
فى الميدان وبدون شماسى
أو فى قهوة بس قاعد ع البلاط
بامشى دايماً ع السراط المستقيم
تحت باطى فُرشتى
ع الكتاف صندوق قديم
فيه علب ورنيش.. وليه
ع الجوانب رفرفين
كل جنب عليه أزايز
فيها صبغة وخرقتين
بس عينى تبص دايماً ع الجزم
واللى بينى وبين زبونى نظرتين
نظرتين مالهمش تالت
رجلُه حطِّت رجلُه شالت
كل ده من خبطتين
ثم إيدك ع الحساب
كل ده من غير كلام
أصل انا من غير مؤاخذة
ورنيشجى فى عشق الجزم
دايب غرام
أجمل ليالى العام شتا
لما المطر يجعلها وحل
يبقى شغلى زى نحل
مين بقى يقدر يلاحق
زى عيِّل فى امتحانه
بس جاب كبشة ملاحق
رزق زى الرز آتى
رزق زى الفول حراتى
يا شتا محتاج بلاطى
بس انا محتاج أورنش
عينى مش ممكن هترمش
نظرتى ممكن تطاطى.
.................
مسحرااااااتى..
مسحرااااااتى..
مسحرااااااتى.
| |
|
| | |
وفاءعبده
موجة شرفيه
عدد المساهمات : 492
تاريخ التسجيل : 04/05/2010
| | موضوع: رد: مسحراتى لاشهر الشعراء وكل يوم مسحراتى جديد الخميس سبتمبر 02, 2010 6:19 pm | |
| رمضان هل بنوره
جاء الجمال بفيضه
نفحات عطر ترتوى
منها النفوس الظامئة
عل القلوب تحتمى
برحيق انس هادئة
جاءت عيون تكتحل
بدموع شوق راجية
وقلوب اعياها الهوى
لنظرة رب حانية
رباه يارب النعم
اعتق رقابا ارهقت
بذنوب دهر باقية
وافئدة راجية
على ابوابك جاثية
| |
|
| | |
| | مسحراتى لاشهر الشعراء وكل يوم مسحراتى جديد | |
|
أمواج الأندلس 
الرئيسية 
أحدث الصور 
التسجيل 
دخول 
افضل موقع لتعلم الجرافيك 
أضغط وادخل وابحث 
