البنت المصرية

هى بنت غير كل البنات
هى الاصل فى كل الحاجات
هى اللى فى عينيها احلى الحكايات
هى اللى عشانها
يضيع عمرى اللى جاى
وضاع عمرى اللى فات
هى السمرة
والبيضة والشقرا والقمحاوية
هى اجمل لحن فى اغنية
هى البنت الاصيلة البهية
هى اللى من اقدم العصور
كانوا يقفوا على بابها بالدور
هى التاج فوق كل راس
جوهرة نادرة غالية
هى ولا كل كنوز الدنيا
هى اغلى من الذهب والماس
واللى يعترض على كلامى
واللى يقول غير كده
يستاهل على راسه ميت مداس
هتقولى طب والراجل
الراجل هو الراجل
ولازم يكون ويبقى راجل
اما هى وقت الشدة
تلاقى وقفتها بميت راجل
هى اللى دايما فيها الخير
هى اللى بتتحمل كتير
جواها الحنان غريزة وفطرة
اتخلقت وفيها الحكمة والفطنة
هى نبع المحبة والامان
هى اللى لو لفيت وشوفت
ومهما جيت ولا روحت
مستحيل يغيرها الزمان
طيب شوف لما تقع فى حب
بنت مصرية
شوف ازاى بتدلع عليك
ولما تكون شقية
وترسم فى حياتك ببرائتها
اجمل لوحة فنية
على كل المشاعر الحلوة بتربيك
وازاى بيكون خوفها
وغيرتها عليك
بيتكون الجنة بين ايديك
البنت المصرية
بتتمثل فيها كل معانى
الرحمة والانسانية
ازاى بتكون ضعيفة فى حبك
وازاى بتكون قوية
وحضنها اللى بيدفيك
ومن قساوة الدنيا تحميك
ولو انت مجروح بتداويك
ولو حتى جرحتك
شوف ازاى لانها غالية
بنار الجرح تكويك
كل يوم الصبح تفتح شباكها
تمد ايديها لربها تدعيلك
وجوه عينيها بتشيلك
ولو فى يوم هجرتها وسيبتها
لو احتاجتها بردوا بتجيلك
بتبقى عليك وتستناك
لو كنت فى الغربة بعيد
لو وزعت اخلاصها ووفائها
على الكون بيكفى ويفيض
البنت المصرية
هى الاميرة وانت الفارس
هى الملكة وانت
من كل عين عليها حارس
هى شمس الدنيا ونهارها
هى قمر الليل والسما ونجومها
دى بنت اتخلقت من ضلع ادم
عشان يحميها
وانت اتخلقت عشان ترعاها
وتكون ضل ليها
مش عشان تستقوى عليها
البنت المصرية
عطائها عطاء البحر
ولا يوم تمل من الصبر
اسألها ازاى بتتحمل
تكون مجروحة وانت بجرحك
عليها بتكمل
صدقنى مش كتير عليها
لو عشت العمر كله ليها
حتى لو خدام تحت رجليها
تسهر انت وتنام عينيها
لا هو عيب ولا غلط ولا حرام
ده كلامى ومش مكسوف انى اقوله
ورسالة لكل واحد فارد طوله
يتريق على كلامى
ويقول ايه اللى الواد ده بيقوله
ازاى اعيش خدامها
تخدمها يعنى تحفظها وتكرمها
جوه عينيك تشيلها
تعيشها كأنها فى الجنة ونعيمها
ترعاها وتصونها
وانا مش خجلان انى بقولها
لو عيشت اكتب فيها
كلام الدنيا ما يكفيها
اصل على الاقل بالنسبة لى
دى مش واحدة عادية
دى كفاية انها البنت المصرية