الحديث الاخير

جاتلى حبيبتى فى ليلة
قالتلى انا جايلى عريس
ضحكت وقولتلها وماله
مش بيقولوا الجرى للمتاعيس
قالت كلامى جد اسمعنى
قولتلها طب وايه يعنى
ردت بصوت مكتوم
اوعى تكون بسهولة ناوى تبعنى
قولتلها بايدى ايه اعمله
وانا فقرى دايما واجعنى
روحى هو احسنلك منى
طيب لو حكيتى لاهلك
هتقوليلهم ايه عنى
هتقوليلهم فقير معدوم
ومحلتوش غير اللى لابسه من هدوم
تلت تربع اليوم بيصوم
وبيكمل عشاه نوم
حياته كلها هموم على هموم
على غم بينام ويقوم
يقلولولك طيب هتتجوزيه
عشان يسقيكى المر كل يوم
طيب هيقدر يجيبلك شقة وعفش
وانتى عندى مهرك غالى
وعليه مقدرش
ويقولولك لازم تنسيه
ولازم هو ينساكى
مفيش حاجة اسمها
بتحبيه وجى على هواكى
واروح اقابلهم يقولولى
بنتنا لسه صغيرة مصلحتها متعرفش
ومعندناش بنات للجواز
وانت صغير طايش مسئولية متتحملش
وعرضنا وشرفنا متصونش
وعلى بنتنا متؤتمنش
يعنى من الاخر متنفعش
او يقولولى
لو بتحبها بجد
تسيبها تشوف نصيبها
مع الانسان الجد
ولو فعلا بتخاف عليها
سيبها للى يقدر من الدنيا يحميها
سيبها ومتفكرش تانى فيها
وامشى وعينى مكسورة
وتكونى عندى مجرد صورة
عارف انك مصدومة فيا
مصدومة من كلامى
بس انتى مش فى مكانى
وعمرك ما هتكونى مكانى
انا جنى عليا زمانى
انتى ضحيتى ياما عشانى
ودلوقتى شايفة قصادك انسان تانى
بس انا معدتش قادر
اعافر مع الدنيا تانى
بس امانة متقوليش انى ضعيف
او انى بسهولة بايعك
انتى عارفة قد ايه انا كنت حابك
وانى كنت بجد عايزك
وعارف اد ايه دلوقتى جرحك
عليا فى يوم متبكيش
انا اصلا مستهلكيش
فى عينيكى دمعة مستهلهاش
احنا خلاص
نصيب مع بعض ملناش
وانك لسه عايزانى
بترجاكى متقوليهاش
وفيا اكتر متعذبيش
انتى تستاهلى انسان الدنيا حبيته
مش حد الدنيا هديته كرهته
وزمانه عليه عصيته
وفى كل طريق وقفتله صديته
قصاد احلامه وقفته وحصرته
حاول يعافر معاها عجزيته
روحى لاهلك قوليلهم
انك على العريس موافقة
وانك خلاص دلوقتى ليا كارهة
وان كلامهم صح عليا
وان رايك كان غلط فيا
وان حبك ليا غلطة
وان مشاعرى مكنتش صادقة
وانك هتنسينى فى لحظة
ومش هكون على بالك
حتى ولو مجرد فكرة طارئة
اما انا يكفينى دعاكى
يمكن اقدر فى يوم انساكى
واخلع من قلبى هواكى
ومن النهاردة
خلص ما بينا كل الكلام
يا حبى اللى فات
وجرحى اللى جاى سلام
هتمنى اشوفك دايما وبخير
اكيد هيكون بس فى الاحلام
يا اغلى ما ليا سلام