حمارة أبو حسين
ـــــــــــــــ
ماتت الحمارة يا أبو حسين
خسارة و100 خسارة
كانت حمارة لكن جبارة
تمشي تتهز و تتمخطر
تجري تقول فشر الطيارة
تقولشي دايرة ببنزين
وخلاص ماتت يا أبو حسين ..
كانت لسا في عز شبابها
مهنش عليك يوم تضربها
قر الناس وحسدهم صابها
ولسا ما وصلت ست سنين
وخلاص ماتت يا أبو حسين ..
كنت شادد بيها الحيل
في الخدمة أحسن م الخيل
تسأفر بيها لو بالليل
ع الدولي ولا أي كمين
وخلاص ماتت يا أبو حسين ..
عيني عليك راح تحتار
إزاي هتجيب طلبات الدار ؟
حتركب أيه لو لك مشوار؟
و إزاي هتجيب التموين ؟
ما خلاص ماتت يا أبو حسين ..
وأي حاجة مهما تكون
بتقدم خدمة تمد العون
على الإنسان ما بتهون
حمياه م السلف والدين
زي حمارة أبو حسين
***********
بقلمي
إسماعيل الطواب
(ابو منه )