ابو منه عضو مميز
عدد المساهمات : 597 تاريخ التسجيل : 24/01/2010 العمر : 47
| موضوع: حلم سفر الإثنين أكتوبر 15, 2018 10:49 pm | |
| حلم سفر ـــ قالوا خلاص يا بني خلصت علم وجيش لكن الحقيقة المرة شغل بشهادة مفيش هاجر وسيب البلد ملكشي فيها عيش أسافر ... بس إزاي .. وفلوسي متكفيش ؟!! دلوني على عمران سفر صلاح وعليش رحت ووقفت طابور تقول طابونة عيش قلتلوا نفسي أسافر خليني أقب أعيش قالي عشرين بواكي قبل البازبور والفيش رجعت لأمي حزين قالتي ما تبكيش وأتسلفت م الخلق وباعت السرير والنيش جريت عليه بالعجل وهمستله بشويش سفرني في أقرب وقت وحزودك بقشيش قالي بكره العشا تقعد ع الشط ماتمشيش ودعت أمي وقالت كان نفسي متسبنيش على عيني ياأما أسيبك على الحصير والخيش بكره راح نتمرمغ على الحرير والريش ومشيت وشايل شنطتي تقولشي مخلة جيش ومشيت وبتداري م الخلق متشوفنيش وهناك على الشط لقيت واقف أمم شباب زي الورد مليان عزيمة وأمل وعمران جه رصنا وفي ايده ماسك قلم ونده لنا بالاسم ولكل واحد رقم وقبض المعلوم وقال لصاحبه أستلم وفوق مركب صيد رصونا زي الغنم ومشينا فوق الموج تلات ليالي طوال وكل واحد فينا يتسامر لنا بموال اللي يحكي عن والده أواخواته واللي يحكي عن أمه أو العيال وأملهم فيه بإنه حيحسن الأحوال وأحلامنا بتقدف في موج البحر وتنادي للبر يجي براحة البال وفجأة الريح صار إعصار يطوحنا يمين وشمال والموج غدر بينا وأصبح كأنه جبال وطير أسود على كتافنا بجناح مفرود وكل لحظة واحد فينا يأخده الموت صرخت وقولت يا رب نجيني وألطف بيا ورا الأوهام أنا ضعت وكنت ضحية وأمي وبلادي كانوا أولى بيا لقيت ايد ممدودة لي في وسط الموج وصوت أمي بتقول يا أبني أصحى بقينا الضهرية ............. كان حلم سفر لكنه كابوس علمني حقيقة منسية بلادي وأهلي يستاهلوا أقدم عشانهم تضحية والسعادة بعيد عنهم بالمال سعادة وهمية
بقلمي إسماعيل الطواب (أبو منه ) | |
|