أمواج الأندلس أمواج عربية
أهلا ومرحبا بك زائرنا الكريم، إذا كانت هذه زيارتك الأولى للمنتدى، يشرفنا أن تقوم بالتسجيل اذا رغبت بالمشاركة في المنتدى، أما إذا رغبت بقراءة المواضيع فتفضل بزيارة القسم الذي ترغب أدناه
عزيزى الزائر يسعدنا ان تنضم الينا وتلحق بنا
كى تفيد وتستفيد بادر بالتسجيل مع اطيب الامنيات ادارة المنتدا
ورجاء التسجيل باسماء لها دلالية الاحترام



وطن واحد هدف واحد قلب واحد قلم واحد تلك هى حقيقة أمواج الاندلس
 
أمواج الأندلسأمواج الأندلس  الرئيسيةالرئيسية  التسجيلالتسجيل  دخولدخول  افضل موقع لتعلم الجرافيكافضل موقع لتعلم الجرافيك  أضغط وادخل وابحثأضغط وادخل وابحث  

شاطر | 
 

 مش ام الدنيا

اذهب الى الأسفل 
كاتب الموضوعرسالة
Enamoredmuslim
عضو مميز
عضو مميز


عدد المساهمات : 7
تاريخ التسجيل : 19/02/2012
العمر : 26

مُساهمةموضوع: مش ام الدنيا   الإثنين مارس 19, 2012 11:31 am

ياللى كنتى ام الدنيا
مش انتى اللى كانوا زمان
بيندهوكى بلد الامن والامان
لا عاد فيكى امن ولا امان
بقيتى زى المزحة بين الاوطان
والانسان فيكى ما بقاش انسان
مليت منك سنين شكوى
مليت فيكى من الاحلام
شربت المر من كاسك
سنين وايام
وكرامتنا عندك شئ ما يسوى
كرهت فيكى حتى الكلام
نسيت معنى السلام
يعنى ايه الفساد فى كل مكان
انتشر فيكى زى سرطان
فساد ما يتحصر فى الاعلام
يعنى ايه مجلس بيحمى البلاد
بقت مهمته بس العناد
يعنى ايه مجلس نفاق
يعنى ايه يحكمنا اوغاد
يموتوا ناس من الجوع
وبيصرفوا ملايين للمخلوع
يعنى ايه مجلس بدقون
انتخبوه الناس باسم الدين
وللامانة اللى عنده بيخون
شايفين اللى بيجرى وساكتين
واللى يقولك دول سلفيين
واللى يقول ليبراليين كفرة
واللى يقول علمانيين ملحدين
يعنى ايه فساد فى القضاء
يعنى ايه قاضى من غير ضمير
يعنى ايه قاضى جبان
يسفر متهمين بأمر من الكبير
ويخلينا لعبة فى ايد الامريكان
يعنى قضاء كل احكامه براءة
براءة للى الملايين بيقتل
براءة للى بيطفى نور العيون
براءة للى بيسحل
براءة للى بيعرى البنات
انا اسف يا كل البنات
اسف لما سحلوكى وعروكى
واسف لما فى الاعلام دبحوكى
اسف لما كشفوا عذريتك
وقالوا وعادوا فيكى وشوهوكى
اسف لما كسروكى
اسف يا اجمل عروسة
من الجرح والاهانة مدبوحة
اسف على رجولة انعدمت
وعلى اخلاق ضاعت
ومبادئ بالتراب اتباعت
وعلى نخوة بالندالة اتغطت
اسف انى على الظلم ساكت
وعلى كرامتنا اللى اتهانت
وبلدنا اللى قصاد الدنيا اتعرت
وعلى عينى اللى اتكسرت
من الفضايح اللى كترت
ومش بأيدى حاجة اعملها
وطول عمرى بقول الخير فيها
بس شكل خيرها فى غيرها
تعبت من قصايد فيها بشكى
ومبقتش قادر اتكلم ولا احكى
وحتى فى عز فرحتى ببكى
اتخنقت وخايف اقول كرهتك
بس ايه اللى كويس فاضلك
مبقتش فخور انى بنتميلك
وكرهت انى ابن نيلك
ولا انتى بقيتى ام الدنيا
مفيش ام بتكره ولادها
ولا ام بتفضح بناتها
ولا ام بتقتل شبابها
ولا ام تسيب ولادها ضايعين
تسيبهم مرضانين
ولا ام تقسى على ولادها
وتخليهم فى الدنيا مرميين
المرة دى مش عايزك
على كلامى تعذرينى
لانك معدتيش تلزمينى
ومن الليلة
ولحد ما ينصلح حالك
مش عايز اسمع اسمك
ولا حتى تقولى انى ابنك
تعبت وملانى الضيق منك
واللى يسألنى انت مين
هقوله انا تايه غريب
فى وطن عايش فيه من سنين
وكل اهله فيه تايهين
وطن الغلابة الطيبين
ومن كلامى هيفهم ويعرف
انا كنت بتكلم عن مين
الرجوع الى أعلى الصفحة اذهب الى الأسفل
 
مش ام الدنيا
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
أمواج الأندلس أمواج عربية  :: الشعر العامى-
انتقل الى: