تابع يوميات علية وصلاح
2
صلاح : فين الشراب والجذمة ؟
علية : وانا ايه عارفني ؟
صلاح : صحيح ولية ملكيش لزمة
ـــــــــــــــــــــــــــــــــــــــــــــــــــــــ
صلاح : حتى الزرار مخيطهوش
وكل كلامك عاوزة فلوس
علــية : ياما قولت وأيه أتغير
دا المتعوس متعوس
ياما قولتلك أتصرف ... مبتتصرفش
صلاح : يعني أسرق ؟
علــية : والله معرفش
دا أنا جنبي بيوجعني بقالي شهر
وعاوز أروح للدكتور
وإزاز البلكونة مكسور
والشهر اللى فات
صلاح : ماله راخر ؟
علــية : مدفعناش وصل النور
ومدرسة الواد عاوزة المصاريف
بعتوا عليها مية مرة
وأنا زهقت .. أعمل ايه ؟ أولع في نفسي
صلاح : والله انتي حرة
علــية : غلبت أقولك شوف شغلانة
بعد الدهر تساعد معانا
بدل السهر ع القهوة
وقاعدة الدار
دي كل حاجة بقت غالية نار
صلاح : حقدم تاني على سلفة
علــية : كان غيرك أشطر
كريم : أنا ماشي.. لحسن حتأخر
صلاح : خلي بالك من السكة
علــية : تخلص مدرسة وتيجي علطول
متقعدش تلعب في الحتة
صلاح : انتي معندكيش رحمة
عاوزاني اشتغل ليل ونهار
ادور في ساقية زي الحمار
علــية : يا راجل حاجة تساعد في المصاريف
منتا بقالك عشر سنين موظف
عملت ايه من شغلك في الارشيف
الناس بتمشي أمورها وربنا مسهلها
وانت ماسك ع الذمة وعاملي شريف
صلاح : عاوزاني أأكلكم حرام ؟
علــية : لا إزاي نموت م الجوع
تأكلنا حرام
دا اسمه كلام
بقى كل الناس دي عيشتها حرام
منتش شايف جارنا عصام ؟
ولا شهادة ولا علام
ولا وظيفة ولا كتر كلام
كل يوم داخل ومحمل
مش زيك إيد ورا وإيد قدام
صلاح : راح فين بس الحزام ؟
علــية : ولا مراته نبيلة .. يعيني عليها
مش مخلي في نفسها حاجة
جبلها الغسالة والتلاجة
دا كمان جبلها دش وغير لها التليفزيون
صلاح : أنا سايبه إمبارح في البنطلون
علــية : ولا الفساتين من كل شكل ولون
ولا العفش اللي حاطه في بيته
صلاح : أهوه ....... كويس .......لقيته
أنا ماشي
علــية : حتة أنتريه وسفرة
جابهم إزاي أنا مش عارفه
ويا سلام بقى على الستاير ....... تحفه
ولا السجاجيد ...... ولا النجفة
ولا المطبخ أبو دورين
ولا .... !!! صلاح .....صلاااااااااااح
الراجل ده راح فين ؟؟
يخيبك راجل ..... مشي وسابني
اكلم نفسي
زي المجانين
[size=21]
الباب بيخبط
علــية : أيوة .....جاية
مين ؟؟............مين ؟؟
قال يا قاعدين يكفيكوا شر الجاين
*************
يتبع