خمس نصائح لاسترداد الضرائب المدفوعة للحكومة

بما أن فلوس الضرائب بتاخد دورتها و بترجعلنا في شكل عربات ترحيلات
وعصيان وقنابل مسيلة للدموع وبدلات للظباط، فمن الأحسن أننا نحدد بنفسنا
طرق وأوجه صرف الفلوس دي، أو على الأقل نستهلكها، و فيما يلي أول خمس
نصائح.. يالا بينا:
حافظ على إلقاء القمامة في الشارع: وخاصة الشوارع الهامة
والحيوية اللي بيعدى فيها البهوات، بالطريقة دي هايصرفوا فلوس أكتر على
نظافة الشوارع، وهاتبقى متأكد إن إتاوة الضرائب اللى بتتفرض عليك على الأقل
ليها لزمة، أو على الأقل أديك شايف الفلوس بتروح فين، وبتوفر لهم طرق أحسن
لصرفها.
احرص على تخريب كل ما هو مرافق عامة وحكومية: كدة كدة
المصالح دى في وشهم ومش بتاعتنا أصلاً، دي أماكن منتدب فيها بعض المصريين
لتسيير مصالح النظام في مقابل السماح لهم بالرشاوى الصغيرة.
احرص على أخد حقك ناشف: يعنى أهرب من دفع تذكرة المترو ونط من ع المكنة.. زوغ من الكمسارى في الأتوبيس، وهكذا.
حافظ على ثقافة السبعة ونص: وهى ثقافة عالمية أصيلة،
تتلخص في ثمن علبة اسبراى، تستطيع بها أن تعبر عن رأيك بحرية عدة مرات، حتى
مع محاولاتهم البائسة في طلاء الحيطان، وحاول أن توجد علاقة حميمة بينك
وبين عمال الطلاء (أترك تعليقات بين أقواس من نوعية الله ينور.. على فكرة
اللون دا عاجبنى)، صدقنى هاتفرق كتير معاهم.
حاول الحصول على كل ماهو متاح مجاناً (بالرغم من قلته): شبكة إنترنت مفتوحة، كوباية مياه ساقعه في مصلحة، أدوات مكتبية رفيعة.. صدقنى الحساب هايجمع وهاتجمل معاك.

من مدونة جيمي هودhttp://www.gemyhood.com/