فؤاد حداد فى الجزء الثالث قتيل المحبة 14 قصيدة

إفادة بالفيضان

التمام
عك س التمام
عجز التمام
استهدوا و خلاص
الحية من الراس
السلم من وسطه
زغرودة من الديل
المَية على حيلها
الدنيا حلوة من السما للقفل
المشنقة على شوكة تلمس طفل
عند القضاة المذنبين البكر
الفجر اللى استنعموا الأبراش
أحق خلق الله
بالذاكرة و الحياة
الكون تبلبل و الزمن رعّاش
حتى فى المستقبل
مين اللى ح يفيدهم
إيه اللى ما بيجراش

حكايه

اللى بَاقُوُله حَصَلْ و الاّ ما حصلش ، و الاّ كان بيحصل بحس واطى ما حدش سامعه .
مَالْيَه السما حدّايه .. ماليه السما اللى بتاعة العيون .. و السما بتاعة الودان
حدّايه ، إنما حدايه ، اتصور حدّايه مفلطحه .. مناخيرها بتغنّى
وكان الشجر ترْكواز
و كل زير .. فى الظله .. شيخ النجارين ركّب عليه اربعة اكواز
فى العصر ، و ميدان العتبه اللى حادف على ميدان أم المصريين ، كَرْمش من تُقل صوت الحدّايه ، من كُتر صوت الحدّايه
و صوت الحمامه و الاّ ايه .. العصفور ماكنشِ باين خالص
و لا حد قادر يفلفص ، و لا ظِلَّه تتملَّص من التبعه
و صوت الحدّايه يسرسع .. واثق بطىء معتد ، زى الفلوس بالقطّاره و السم بالسرسوب ، السم بالمنشار
فلاّح بلاّح زَرَع نخله فلاّح بلاّح
يا عماد الدين جاد المولى فلاّح بلاّح
بين الوحشين انا الاحلى فلاّح بلاّح
و افلح فى الطين و فى الدوله فلاّح بلاّح
بين الواطين انا الاعلى فلاّح بلاّح
دنيا الجايين ما هيش سائله فلاّح بلاّح
بين التانين انا الاوّلى فلاّح بلاّح
كان حلم و فجأه عيون الحدّايه اتفرتكت فى الهوا ، و هى اتفقعت زى عينيها من الغيظ ، و العصفور اتنشق زى اللى فاق من الحلم
طبعاً لازم احلف ستميت حلفان علشان تصدقوا و لاّ ما تصدقوش إنه حلم والاّ حقيقه ـ
مش كله واحد ، ولا كله زى بعضه
بس انا اللى عجّزت و فرحت لما افتكرت انى حارجع زى زمان طفل صغيّر
اتوه و اسأل عن مطرح البيت الفيروزى البحرى ، عَلّمته بعصفوره و نخله و حبل
و جلاليب زرق و جلاليب زرق
ماشيه بطول البحر تزُق

الفيضان

زى ما محمد نجم
يا محمدات النجوم
كان بيكَسَّر الصخرة العظيمة من ضرس الجبل بالقدوم
و كنا
بأمارة ما قلنا
واقفين بنتفرج عليه
كل واحد و غلقه
مستعجبين بالرضى و الغضب من حواليه
سبحان اللى خلقه
و الصخرة الكبيرة زى النسر تحت عنيه
واحنا الولاد اللى انطلقوا
بالصفافير فى بطن الشمس و بطن الليل
و زغاريد الصبايا تقول الويل للويل
مفاتيح قصايدى كلها مسجونة
و مسكونة
بالجن والعفاريت ، قبال الجن
ستى الشامية عَنيده
جدى الشامى عنيد .. ميتين بالعند
رُخرين معاي و قالوا لى
ودن فى ودن ..و بُق فى بق .. عاشق و معشوق
والصوت و الصدى فى الصدف اللولى
و فى خان الخليلى
يتشغلى لى وبيشتغلوا لى
دموعك يا غولة معبأة ـ فى قنينات
و القوافى معلقة ـ للتمانينات
تعالوا نتفرج على البترينات
لأ ، بعدين
دلوقتى هوانا رفيع العين
مجمد نجم قاسي الملامح
لأن الدم و اللحم مش ممكن يسامح
بعد ما نتجلد
مش ممكن نتولت علشان السياح
سرحان فى اولادى يا ابا من قبل ما اتولد
اولادى من الديكتاتورية و البرلمان
اولادى من الليمان و من خمر السراب
من نزلة السمان مغبش فى القفص
و السما و التراب
و الشبك و الخراب

الحمار الحزين

عبيط غبيط لمشالكم
أنا هُوُ
و موردلة لوردَّالكم
انا هو
حرام حلال يحل لكم
انا هو
سكت .. مُت .. بدلكم
انا هو
................
ابص عينى تفَرْهَضْ
ليه ابص ؟
هاتوا لى واحد ينهض
و الاّ نص
على قفا اللى بينهج
قالوا رص
كل الخلايق تنهق
و انا هس
انا هو
عبيط غبيط
...............
عيط لك يا مقاطفي
من بعيد
بدموع غسيلى و شطفي
و بصديد
انا الرصاص المطفي
و الحديد
غير الحديد و عواطفي
اناهيد
انا هو
عبيط غبيط
...............
قال ايه علينا نفَسَّحْ
الوردون
تضحك علينا تسخسخ
الدقون
يا شبر طولك فرسخ
بالقانون
انا اتركب انا اوردةح
انا اهون
انا هو
عبيط غبيط
...............
لو كنت طايق طايل
زى دُولْ
غََرَّقت بختى المايل
فى الكحول
شوف اللى شاعر قايل
قول لى قول
شايل قوافى و شايل
انا هول
انا هو
عبيط غبيط
...................
بنزين زمانه ما وَدَّعْ
فول حِِِرِيِتْ
يا ريته ينفع ينتع
آه يا ريت
لو كان بيدى البردع
ما اشتريت
افهمنى قبل ما ابرطع
انتهيت
انت هو
عبيط غبيط لمشالكم
وانا هو

خمسة بحبك موت

الموت هناك ولاّ هنا
يصعب على اولادنا
اكبادنا
اللى ما شافوا من الوطن
الاّ الخيال و من اللبن
الاّ المعونة فى الصفيح
ما يكفى طول عمرى اصيح
***
الموت هناك ولاّ هنا
يصعب على اولادنا
اكبادنا
هذا اليتيم اللى بكى
مولود فى ليل المعركة
ما ضحكش سِنُه للزمان
ما اعرفش ان النور امان
***
الموت هناك ولاّ هنا
يصعب على اولادنا
اكبادنا
هذا الجناح المنوردةر
يا هل ترى يوم ننتصر
يرْجع جناح .. ينسى اللى راح
وكفاية جرحه فى الجراح
***
الموت هناك ولاّ هنا
يصعب على اولادنا
اكبادنا
مش باقى غير ظل السنين
فى الذاكرة و صدى الانين
هذا العجوز اللى اغترب
بين اليهود بين العرب
***
الموت هناك ولاّ هنا
يصعب على اولادنا
اكبادنا
شوفى الغارات مثل الغارات
شوفى السما بالطيرات
المعتَدَى كالمعتَدِى
وسلاحى اقرب من يدى
***
الموت هناك ولاّ هنا
يصعب على اولادنا
اكبادنا

كلنا من الطير

منين يا عم ابراهيم ؟
قال لى انا من الطير
يا ميت صباح النعيم .. و يا ميت صباح الخير
ما احلى الشقا لما اشقى
بقلب اعقل و اشقى
من العقول الشقية
أَعـْدِل جناح الطاقية
وافتح عراوى الصدير
لسه ف حياتى بقية
تسأل عيونى اللى عاشقة
الطير مزاج والاّ نشأة
والاّ الغرام اللى جابنى
و الجو صاحى عجبنى
اقولك الحق يا ابنى
كلنا من الطير

حِلْمْ عبد الله العجوز مع السلطان

باحلم انى فى اسطمبول
بالعب طاولة مع السلطان

بيحمرق اعمل مش شايف
و يِبَرَّق اعمل مش خايف
و الحظ محالف و مخالف
لو اخسر ابقى انا مسطول
لو اوردةب ابقى انا غلطان

باحلم انى فى اسطمبول
بالعب طاولة مع السلطان

كل ما ايده الزهر بتلمس
باحلم على انفاسي بتكبس
انه بيضرب و انه بيحبس
اشي بالعرض و اشي بالطول
اشي فى الفاضي و فى المليان

باحلم انى فى اسطمبول
بالعب طاولة مع السلطان

ده بيحكم على طه و جورجي
على فلاّح و عالم و ناضورجى
و بيطلب درجى تحْبِى درجى
و بيستعبط مش معقول
و بيضحك زى الانسان

باحلم انى فى اسطمبول
بالعب طاولة مع السلطان

و عيونه بتتمهزأ بيه
و حواجبه ايضاً لعبيه
و ده قاعد فوق الدهبيه
وكأنه صاحب اسطول امريكا فى آخر الزمان

باحلم انى فى اسطمبول
بالعب طاولة مع السلطان

و يقولك انا مالك عرشى
و كيسنجر لسه ما ظهرشى
و انا بأهرش و بأحرك و ارشى
القزعه الازعر جون بول
و فرنسا و عقل الالمان

باحلم انى فى اسطمبول
بالعب طاولة مع السلطان

قال و السارق دايماً ناكر
و القاتل تلاقيه مش فاكر
كله ورق و فلوس وتذاكر
بيفهمنى : العالم غول
انا ساكت و - الدنيا شيطان

باحلم انى فى اسطمبول
بالعب طاولة مع السلطان

باحلم انى مؤكد حابْكِى
و دموعى سالت من شكى
و بقول يمكن و بقول بلكى
انا باحلم و انا مش مسؤل
الدم بيجرى فى لبنان

باحلم انى فى اسطمبول
بالعب طاولة مع السلطان

رقصة النملة

يا ارض يا معزّقه
يا حَبابى متبعزقه
يا مخططه و أُ لعبان
عرايانه و محزقه
دايره ما دار الزمان
مضمومه متمزقه
ركبت شعوب ع الحصان
بالرمح مسترزقه
شمشون تخايله الحيطان
و عيونه متخزقه
الليل ما لهش اوان
و الفجر له شقشقه
كان النبى سليمان
ساند على المنسأة
و الجان فى نار الليمان
عطشان و لا من سقى
ع المفترق مهرجان ولاّ على الملتقى
ع الحبل يا بهلوان
و الا سلب مشنقه
نمل فؤاد الحنان
حداد ابو المطرقه
بيقول لى ارقص كمان
و باقول له اسمع بقى
ما تطرطقوش الودان
اكتر ما هىِ مطرطقه
سمسم فتح البيبان
ع البهلى و مبهوأه
سمسم باحب السمان
سمسم على مفتقه
يا هيل يا هيلمان
يا لطف يا زقزقه
شفت النبات حيوان
و البيض كأنه النقا
شفت المصانع غيطان
عينى رجلى متشققه
كان النبى سليمان
ساند على المنسأه
و الجان فى نار الليمان
عطشان ولا من سقى
الماضى كان يا ما كان
و الغد فى الشرنقه
و العلم علم الرهان
و الفن فن الشقا
***
انا كلمتى حكمه
انا رقصتى حشمه
انا شايله دى الحزمه
ايا ظهرى و كلايا
مليم و نكلايه
فجلى و جرجيرى
آه من تجرجيرى
شايلين حجر جيرى
و انا شايله سلاَّيه
لو تحسبوا الحسبه
بالنسبه
بالنسبه
انا شايله جبلايه
انا شايله هملايا
انا نمله نملايه
انا نمله
رجلى يا تلامذه
لا سبعه ولا خمسه
متجانسه
متباعده متلامسه
متكامله
انا نمله
انا دغرى
من صغرى
وفَّرْت لَفَّاتى
و عَدَلت دفاتى
و حسبت مسافاتى
و انا طالعه و انا نازله
انا نمله
انا نمله مش آله
انا عيله مش عاله
بمزامله شغّاله
شغاله بمزامله
انا نمله
لا انا بنت اراجوزه
و لا ست براجوزه
لكن انا العامله
انا النمله
و الحمد لله
انا نمله مش غوله
انا نمله مشغوله
مشغوله بالتموين
و عيالى و مساهم
ما افهمش فى التلوين
يمنعشى فقساهم
ناس باللسان حلوين
بالقلب ما اقساهم
***
انا نمله
انا عامله
مش عاميه
مش قارعه كلوا باميه
مش دميه
الدنيا
الدنيا للعمال

تستغرب من ايه

آه مش الف مره
لكن الف آه
لكن شغل بره
حرمنى الحياه
وانا جى احوِّد
واقع فى الكمين
آدى بزّى الشمال على ايدى اليمين
تفتكرنى بأضحك
تلاقينى حزين
تستغرب من ايه
تستغرب من مين
عندك ادباتيه و عندك مجرمين
***
انا الاديب الادباتى
خفيف و خايب يا اخواتى
ما تسمعوش الا صواتى
لكن دموعى ما تكدبشى

دموعى من لولى زمرد
و من حنان كله تمرد
امشى اذا قلت لى اقعد
و اقعد اذا قلت لى امشى

افهمنى صح المرة دى
فى عصر يوم فوق العادى
خايف على شعور مين فينا
على الحبيب و الاّ العادى
خايف تقول غور من وشّى

واللى اختشوا زينا ماتو
اما الزعل بعد ما نوقش
بكل كل احتمالاته
ما عادش يستحمل غشّى

يا اختى مخبأنا كوفيه
متشمسه و متدفبه
يا اختى مخبأنا عبايه
جَنِتْ عليه الحربايه
بعد القنابل ما تعُضَّك
بيسألونى سؤال مضحك
احب اموت و الاّ ما اعيشى
***
دَبَّابه ماشيه فى حز طويل
لَفّت على دماغى داير
عشرة الاف جرحه وقتيل
بيشربوا معانا سجاير

و طفل رابط راسه بشاش
ينفع يكون صورتين منِّى
صورتين فى سِنُّه و فى سنّى
و ان كنت بانسى ما بينساش

والموت على الحجر الجَبلى
فى الغاره بيدارى وردةوفه
و يكش فى القمر الكامل
و يبكى لو حد يشوفه

و كان بيحلم انه برىء
و لمّا يصحى يقوم عامل
خَرْمَان و يعمل بيفتش
فى جيوبه على عود الكبريت

زى البنات العيّانه
عينِيه تقول لسه ما ماتشى
ما دمت قاعد ويّانا

قصيدة غلط - أزمة دموع

انا كنت مالك عصايه و سيف بيتَلْمذ
اما عصايتى فكانت كل ما تغْمِز
فى البحر الاخضر يغنّى يا عزيز يا عزيز
فاكر عاصيتى اللى كانت كل ما تلمس
اللوز فى امبابه يتحول دهب ابريز
و اما سيفى فكان مخلص كأنه عريس
بيغنّى للورد و يخلّى الدهب ترمس
و سَجَدتْ لله صلاة الظهر ما أَشْرَكت
و انا نيل عروسه و نيل بَلاّص ونيل كَتَاركت
وإن اُرى بين جدران الدُرَه اجلس
و فى الف نمله و داسونى و ميت جمل و بَرَكت
و فقير حنين يا نيل ساكت و نيل ما سَكَت
و دائم الطلق بين الضفتين مأسور
مارد بيفْلَح وشاعر مرتعش معصور
و نيل بيثبت و يجرى ويلتفت يتنى
و نيل دنى بيْنَزّل الواطى و طين محفور
ونيل بيعلى و يستعلى و نيل بيفور
و نيل نبت من ثوانى و من سنه و عصور
و نيل بنى السد والنيل اللى هد السور
و زى شعرى اللى طالع عربجى و موردةور
طلعت منصور من العصر الشاهنشاهى
و عزمنى شيخ العرب ع القاهى و الشاهى
اما اللى نايمه و قايمه فى مَلَسْ شاهى
بتقول سهيت لما قلت الدنيا للساهى
و الدنيا لسه هى فجر الليل و ليل الفجر

إعلان

فى الصيف و الاّ الشتا
نايمه و متلفته
الفتنه و الانفتا
و الحا كلها الحمار

وانا بسأل يا ترى
يا غوله مدردره
ليه غيطك لم طرا
الحا كلها الحمار

و الناس اتمعيلوا
فى الظلمه و طولوا
و الفجر لم يلو
و الحا كلها الحمار

يا قَاسِيَه و آسيه
الديك ع الناصيه
عيط من غير صيا
و الحا كلها الحمار

بيعيّط ع الصبا
و دماغه معصبه
ما بقاش للخير صبا
و الحا كلها الحمار

فيه راجل مش ابى
و لا كان يشبه ابى
فعل الفعل القبي
و الحا كلها الحمار

كان رافض الاكتفا
و بياكل الكتفه
قال بطلنا الكفا
و الحا كلها الحمار

راجل فوق السُطُو
بيلت فى قصته
كان صوته بيبسطه
الحا كلها الحمار

و الدنيا مِمَثله
مرضع و مِغَسِّله
عسكر من غير سلا
و ممثل ملحمى
فى البطء جهنمى
افكاره مكلفته
ما فيهاش يا امَّا ارحمى
الظاهْره الملفته
شفافه ..مزفته
الفتنه، و الانفتا
و الحا كلها الحمار

و كمان وحوحى

بنت السلطان
لابسه القفطان
قفطان فسدقى
بحزام بندقى
عقدها لؤلؤى
فشر المرجان
دق يا دقدقى
سلامين على شان
بُقها بُقها
ابتدا انتهى
من غير تهتهه
رعش الكروان
سمسمه سمسمه
سمه تشبه سمه
كدا متقسمه
ألحان ألحان
كدا متبسمه
طرحه ألوان
شفنا بنفسنا
يا حسن حسان
حسنه و محسنه
ركبت رهوان
ركبت الاحصنه
و التختروان
عدت من هنا
بنت محزمه
بحزام بندقى
قفطان فسدقى
عقدها لؤلؤى
بنت التراحيل
لابسه الخلاخيل
بتنقى العود .. العود بيميل
و تقول يا نخيل
انا و انت نخيل
نطلع فى الصوره و الجرانيل
دا قانون تشغيل
فى عنيك زغاليل
يا مقاول ناوى على التأويل
خد بحر النيل صُورّه فى منديل
غربله لو تقدر بالغرابيل
انا ناشره غسيل
ما فيهوش هلاهيل
بازرع وافلح و احط و اشيل
الايام دى غير الايام يا جميل
وانا جيل الثوره غير الجيل
بدليل و دليل و بألف دليل
بدليل المجرى مع التمويل
بنت التراحيل
لابسه الخلاخيل
بتنقى العود .. العود بيميل
*
بنت ابو ألطاف اسمها الطاف
و الاّ اسمها ايه
شفت الزحلفه
ماشيه ملفلفه
لابسه مكلفه بالطو بأغلفه
مالهاش معرفه
بنت ابو ألطاف
و الا اسمها ايه

شفت الضفدعه
ماشيه مربعه
عينها مطلعه راسها مصدعه
داوشه المزرعه :
بنت ابو الطاف
اسمها الطاف و الاسمها ايه
شفت القنبره
فوق القنطره
لسه صغيّرهبتنط اورا
تقول لورا
و تقول يا ترى :
بنت ابو الطاف
اسمها الطاف و الاّ اسمها ايه
شفت القنفده
قاعده مقنفده
لا سؤال و لا نِدا
بس معنده
حتعيش على كده
مش متأكده :
بنت ابو الطاف
اسمها الطاف و الاّ اسمها ايه

رمضان مبسوط
بهلال مثبوت
و فى الاستفتاح
انا قلت فلاح
خُد يا مدّاح
و اسكت يا سكوت
خد ست اقداح
و اذكر لى بهوت
واسم شرمساح
شربات التوت
يا هلالاً لاح
انا ليلى صباح
راجل فلاّح
توت حاوى توت
كتاكيتى مِلاح
كتكوت كتكوت
و خفير اصلاح
رمضان بيدُور
رمضان بيدُور
بيدور على دور
و جزاير نور
مغرب و فطور
تونس و سحور
ليبيل لَبّيت
فى الشام طبّيت
و عراق حبّيت
وسودان هلّيت
مشترى نبُّوت
و دا منه سلاح
و حلاوه و توت
و دا ابنى صلاح
و دا ابنى ياقوت
و دا جه و دا راح
و انا فى الملكوت
و يّا ابنى سماح
إن قلت سداح
و كلام ملتوت
و ليلى بيوت
و البال مرتاح
و العدو منكوت
و الجو بَرَاح
و انا شيخ مبسوط
بهلال مثبوت
و هلالى مشهور
و يا أهل البيت
صُمت و حجيت
و رجعت ازور
و باعوم يا كويت
على بحر الزيت
اردن و رَويت الارض البور
لبنان و عَليت على ارز و حور
قدس و طليت من فوق السور
فى يمن و حبيت
الأم لقيت
و عدن بتثور زيه ما لقيت
معدن مصهور العشا صلّيت
و الصوم و نويت
اسلام حييت
الفجر حضور

فلسفه

تبقى لى يا مُسْعدى يا فن تبقى لى
و ربنا يمد فى ايامى و حبالى
و اكتب كتاب فلسفه فى الشاي ابو نعناع
و فى طالعة الفجر و الدنيا اللى فى بالّى

طالب القرب

انا طالب القُرب من وحوى فى إياحَه
قَمَرَه .. على خدها زغاريد و تفاحه
قالوا لى تكبر عليك انا قلت بالراحه
دى ابوها سلطان لكين البنت فلاّحه

» فؤاد حداد فى الجزء الثانى 53 قصيدة بعنوان الاراجوز
» فؤاد حداد الاعمال الكاملة 45 قصيدة ( المسحراتى ) الجزء الاول
» فؤاد حداد 8 قصائد الغناء
» نور الشريف ينتهى من الجزء الثالث لـ "الدالى"
» إرشادات الحياة القصيرة - الجزء الثالث

فؤاد حداد فى الجزء الثالث قتيل المحبة 14 قصيدة 39-73

قلم شريف الحكيم

اهلا بكم
جميعنا شاهد وتابع بقلق ما حدث فى منتجع سياحى فى تونس ومن قبله حادث المتحف
وكلا المشهدين واحد فالجناة سارو وعبرو ابواب وطرقات دون ان يستوقفهم احد او يشاهدهم احد …

[ قراءة كاملة ]

صباح الخير يا وطن

ان الله جميل يحب كل جميل

ان ظاهرة التحرش التى نسمع بها او نشاهدها هى ناتج طبيعى لانحطاط فى الاخلاق والسلوك يعيش معنا ونتعلمه ونشاهدة كل لحظة فى كل فلم ومسلسل واعلان وعناء نشاهدة ونسمعة وتنتقل عدواه …

[ قراءة كاملة ]