فؤاد حداد 8 قصائد الغناء

عُقْدْ الفُلّ و الياسمين

تعالى نلضُم اسامينا
الفله جنب الياسمينه

قنا سوهاج الاسماعيليه
بنت الصاعيده بحريه
الاقصر غزاله محَنّيَه
فى اسكندريه ترسّينا

و انا رشيدي و دمياطي
آخدك يا منصوره فى باطي
و اغني و ارقص سنباطي
قبل القمر ما ينسينا

و اعدّي ع الجيزه خَفَاجه
وردان ضلوعي الخفَّاجه
عيوني طلّت يا رفاقه
من وادي حَلْفَه على المينا

ع الضفتين ألقى ربوعي
و اعيد ميلادي و سبوعي
من كوم حماده ينبوعي
فى جرجا ابريق الزينه

بلبيس ح نلبس دبلتها
شربين شربنا فى قلتها
بعد المحله ما حلتها
بنها العسل راح تشفينا

و دنشواي اسمها اصبح
اجلّ شاهد بيسبّح
في المنزله الضىّ بيرمح
و في بحر يوسف سواقينا

و الشاي يا واسطه فى السكه
نقعد يا منيا على الدكه
توصل بني سويف الضحكه
نلاقي اسيوط و سطينا

عَصَرْت قلبي الجوَّاني
على التراب الأسواني
رجع يا نوبه عنواني
كوم اومبو رايقه و امينه

وطنطا شي الله يا سيّد
وطهطا نفْلَح و نشيّد
و نزور مغاغه و نعيّد
فى بور سعيد ع التراسينا

ومن السويس قلت يا لاللى
و القنطره فجر تملّي
و الوز الاخضر بيصلّي
على القنايه من سينا

تعالى نلضم اسامينا
الفله جنب الياسمينا

زائر

عَصَرْت قلبي الجوَّاني
على التراب الأسواني
رجع يا نوبه عنواني

بارك الله فيك .... وأعانك على كل خير

يسعدني اني اول من يرد على اختيارك الجميل

م ود ت ي

الاخت العزيزة الحجة وفاء
دائما حضورك يسعدنى
دمتى بالف خير
م و د تى
شريف الحكيم

فؤاد حداد 8 قصائد الغناء Star3

الجِيرة و العِشْرة

في كل حي ولد عترة و صبية حنان
و كلنا جيرة و عشرة و أهل و خلاّن
أميرة عاقلة و فى الحجلة العقل يطِير
كانت صغيرة بضفيرة كان هو صَغِير
ساعة ما تضحك مع اخوها تلاقيه بيغِير
ولَمَّا ترفع قُلّتْهَا تلاقيه عطشان
زمانه ماشى بخطوة يضم
زمانها كبرت و بقت أم
زمان جواب جاى لها بيجرى على العنوان

في كل حي ولد عترة و صبية حنان
و كلنا جيرة و عشرة و اهل و خلاّن
***
الفجر بيلاقي المغرب و بيجى و يِرُوُحْ
و الليل يرُد على الشارع شباك مفتوح
هنا الرصيف وهنا السلِّم وهناك يا سطوح
متعلقة كمام النونو فى ديل الفستان
زمَانُه ماشى بخطوة يضم
زمانها كبرت و بقت أم
زمان ضناهم فى المدرسة كنز الاوطان

في كل حي ولد عترة و صبية حنان
و كلنا جيرة و عشرة و اهل و خلاّن
***
نحضن ولادنا ولا نخلّى حنية و ذوق
نفرح معاهم و نغنى لقدّام و لفوق
يادي العيون اللي بتقرا في كتاب الشوق
الدنيا خضرا و مش فاضل على بكرة زمان
زمانه ماشى بخطوة يضم
زمانها كبرت و بقت أم
اصل الحكاية حكايتنا نبني الانسان

فى كل حى ولد عترة و صبية حنان
و كلنا جيرة و عشرة و اهل و خلاّ

الليله يا سمرا
البنت قالت فستاني
منشور على الشط التاني
خدني المراكبى و عدّني
و رجعت فى القَمَرَه
الليله يا سمره يا سماره
الليله يا سمره

الليل يصَبَّح و يمَسي
و تفكرينى و تنََسِّي
وافطم على ريقك نَفْسي
واتوب من الخمره
الليله يا سمره يا سماره
الليله يا سمره

العنجريب اللي قنيته
تَمَن سنين استنيته
على الجريد اللي بنيته
ح تزهّر التمره
الليله يا سمره يا سماره
الليله يا سمره

يا اللي صفيحتك بغوايش
عايش و لا لغيرك عايش
قلبي و لا البحر الطايش
عيني و لا الجمره
الليله يا سمره يا سماره
الليله يا سمره

أشرد من الظبي الشارد
و ارجع لارضك اتشاهد
و اقول يا وعد اللي يجاهد
على خيلك الضامره
الليله يا سمره يا سماره
الليله يا سمره

قال فينا غنوه و حدودته
قال ما فيناش قولة توته
ماهيش عجينه و ملتوته
كل القلوب حمرا
الليله يا سمره يا سماره
الليله يا سمره

خلّي الندى من احلامك
يسقي النبات من ايامك
حطّي اللي خلفك قدّامك
تلقى البلد عامره
الليله يا سمره يا سماره
الليله يا سمره

كاوبوى دينامو

كاوبوي دينامو
سايق غنمه
علَّق يافطه بعرض الريف
خلّي أَمِيرْكَا
تسْتَعْمرِكا
ست شريفه غرضها شريف

يوم ما بترمي عُقب سيجاره
تفتح بيه توريد و تجاره
شُق الحُصَلَه
إكسر بصله
نخ و طاطى تبقى ظريف
كاوبوي دينامو

خليك جنى وَلَد جنيه
شيل من راسك الوطنيه
نظف مخك أَلاّ تطخك
خَلّيه خالي من التخَاريف
كاوبوي دينامو

لها فى اللعب فنون و براعه
فى مشاريع و بنوك و زراعه
تشتل
تشعتل
تفتل
تقتل
ست غنيه عن التعريف
كاوبوي دينامو

إطلع على مراكبها قلافطي
قولها خدي خلجاتي و نفطي
دي المحبوبه
جاتك غيبوبه
مدرسه حره بالمصاريف
كاوبوي دينامو

حط دماغك تحت جناحها
ارضع فى البزازه مِنَحْهَا
بكره تبَيِّتْ
راقد ميّت
كيف الغاوي مع الحريف
كاوبوي دينامو

علَى باب الله

فنان فقير على باب الله
الجيب ما فيهشي و لا سحتوت
و العمر فايت بيقول آه
و القطر فايت بيقول توت

صحيتني ليه يا شويش يا شويش
لمّا بانام باحلم و باعيش
لما بافوق ما بافوقشي بموت

و تقول علىّ كبير السن
و انا فى قلبي ولد كتكوت
و الدنيا لسه بنت بنوت
اشمعنى قلبي ضناه الشيب ؟

من الشقا مَهْري و منكوت
قال اللي قال العيب فى الجيب
و الجيب ما فيهشي ولا سحتوت

فنان فقير على باب الله
الجيب ما فيهشي و لا سحتوت
و العمر فايت بيقول آه
و القطر فايت بيقول توت

النيل وطن

دول ريحة الدنيا و أهل الزمان , يا أطيب الأهل .....يتبع.

يا ولاد خالات يا ولاد اعمام
البرج بحري في الغرام
والقلب من جوه الصعيد
والنيل وطن ........زالنيل وطن
وهيلا هيلا وهيلا هيلا وهيلا هيلا
الشط لوح من بعيد
قال كل ايد تحتاج لايد
من سقفة وقفة لسقفة عيد
وهيلا هيلا وهيلا هيلا وهيلا هيلا
والحلو شايل قلتين
والشمس تحت النخلتين
طول النهار قاعد لفين
وهيلا هيلا وهيلا هيلا
والدفة يا عبد السلام
والقلع يا عبد الحميد
يا ولاد خالات يا اولاد اعمام

الحدادين

دُول ريحة الدنيا و أهل الزمان ، يا أطيب الأهل
كلمنى منهم ابو العوافى و قال
إن كنت نازل هنا
تسمع لى فن و غُنا
مثل الحديد عندنا .. بيقول : يا ولدى الدقه
ما تصيبش إلا على الدقه!
زِندى يقول يا قوى ، قلبى يقول يا كريم
دُكانى اسود سواد الفحم
لكن مراحب صوتى و كفوفى
مِوَلَّده السيف الذى
لمّاَ يشٌق .. ينوّر الميادين
و اسمع يا ولدى غنوة الحدادين

عندنا عتمه فى عتمه
عندنا نار قايده نار
عندنا عزم دراعتنا
اللى طال شمس النهار
*
أَمّا إن العقل زينه
أما إن العزم أَزين
كنا ياللى غاوى تحزن
حدادين من ألف ليله
مال علينا الدهر ميله
حُطُّه حُطُّه و شِيلُه شِيلُه
قٌمنا قَوّمْنَا الجدار
عندنا عتمه فى عتمه
عندنا نار قايده نار
*
أما إن الصبر طيب
أما إن العزم اطيب
ع الوتد لازم حنضرب
حدادين يا اهل المدارك
نجْلِي اسياف المعارك
قدموا مَهر المهالك
للعروسه فى الديار
عندنا عتمه فى عتمه
عندنا نار قايده نار
*
أما ان العين بصيره اما ان العزم ابصر
عمر ايد حره ما تقْصَر
طول ما نيتها متينه
مهما روحنا و مهما جينا
قَبِّلْ من سور المدينه
الأمل داير ما دار

عندنا عتمه فى عتمه
عندنا نار قايده نار
عندنا عزم دراعتنا
اللى طال شمس النهار

حفيفى رائع استاذ شريف
مجهود كبير لجمع تلك المجموعات للرائع فؤاد حداد
بارك الله فيك
وفى انتظار جديدك
د / اية

» فؤاد حداد فى الجزء الثالث قتيل المحبة 14 قصيدة
» فؤاد حداد فى الجزء الثانى 53 قصيدة بعنوان الاراجوز
» فؤاد حداد الاعمال الكاملة 45 قصيدة ( المسحراتى ) الجزء الاول
» الغناء وملحقاتة
» حداد بدون عزاء للشاعر عبد الرحمن يوسف

قلم شريف الحكيم

اهلا بكم
جميعنا شاهد وتابع بقلق ما حدث فى منتجع سياحى فى تونس ومن قبله حادث المتحف
وكلا المشهدين واحد فالجناة سارو وعبرو ابواب وطرقات دون ان يستوقفهم احد او يشاهدهم احد …

[ قراءة كاملة ]

صباح الخير يا وطن

ان الله جميل يحب كل جميل

ان ظاهرة التحرش التى نسمع بها او نشاهدها هى ناتج طبيعى لانحطاط فى الاخلاق والسلوك يعيش معنا ونتعلمه ونشاهدة كل لحظة فى كل فلم ومسلسل واعلان وعناء نشاهدة ونسمعة وتنتقل عدواه …

[ قراءة كاملة ]